యువ సంచలనం వైభవ్ సూర్యవంశీ (Vaibhav Suryavanshi) తన అద్భుత ప్రదర్శనతో అందరి దృష్టిని ఆకర్షిస్తున్నాడు. ఈ నేపథ్యంలో భారత మాజీ క్రికెటర్ ఇర్ఫాన్ పఠాన్ (Irfan Pathan) అతన్ని వెంటనే జాతీయ జట్టుకు ఎంపిక చేయాలని బీసీసీఐకి (BCCI) సూచించాడు. ఇక అతని విషయంలో ఆలస్యం చేయాల్సిన అవసరం లేదని స్పష్టం చేశాడు.
ఫియర్లెస్ ఆటతో ఆకట్టుకున్న వైభవ్
గత ఐపీఎల్ సీజన్లో (IPL Season) అరంగేట్రం చేసిన వైభవ్ అప్పటినుంచే తన ప్రతిభను చూపిస్తూ వస్తున్నాడు. ప్రస్తుత సీజన్లో మరింత దూకుడుగా ఆడుతున్న అతను చెన్నై జట్టుపై కేవలం 17 బంతుల్లో 52 పరుగులు చేసి సంచలనం సృష్టించాడు. అలాగే ముంబై జట్టుపై 14 బంతుల్లో 39 పరుగులు సాధించి మరోసారి తన శక్తిని నిరూపించాడు.
ప్రపంచ స్థాయి బౌలర్ బుమ్రా (Jasprit Bumrah) బౌలింగ్లో కూడా వైభవ్ ఎలాంటి ఒత్తిడికి లోనుకాకుండా ఆడటం విశేషం. తొలి బంతినే సిక్సర్గా మలిచి అందరినీ ఆశ్చర్యపరిచాడు. ఈ ప్రదర్శనపై స్పందించిన ఇర్ఫాన్ పఠాన్, వైభవ్ ధైర్యాన్ని ప్రశంసించాడు.
వైభవ్ ఆట తీరు గురించి మాట్లాడుతూ పఠాన్ చెప్పినదేమిటంటే, అతను ఎవరు బౌలింగ్ చేస్తున్నారో, వారి శైలి ఏమిటో ఎక్కువగా ఆలోచించడు. బంతిని గమనించి దానిని ఎలా కొట్టాలో మాత్రమే దృష్టి పెడతాడు. అదే అతని ప్రత్యేకత అని అన్నారు.
ఇలాంటి ఆటగాడిని ఎక్కువ కాలం వెయిట్ చేయించకుండా వెంటనే జాతీయ జట్టులోకి తీసుకోవాలని పఠాన్ సూచించాడు. ఇప్పుడే అవకాశం ఇస్తే అతను కనీసం 20 సంవత్సరాలు భారత జట్టుకు సేవలందించగలడని అభిప్రాయపడ్డాడు.
