దేశ విధాన రూపకల్పనలో కీలక సంస్థగా ఉన్న నీతి ఆయోగ్ను (NITI Aayog) కేంద్ర ప్రభుత్వం భారీ మార్పులతో పునర్వ్యవస్థీకరించింది. ప్రధాని నరేంద్ర మోడీ (Narendra Modi) నేతృత్వంలోని ఈ సంస్థకు కొత్త వైస్ ఛైర్మన్గా (Vice Chairman) ప్రముఖ ఆర్థికవేత్త అశోక్ కుమార్ లాహిరిని (Ashok Kumar Lahiri) నియమించింది. ఈ విషయాన్ని ప్రధాని మోడీ సామాజిక మాధ్యమం ద్వారా ప్రకటించారు.
అశోక్ లాహిరి గతంలో ప్రధాన ఆర్థిక సలహాదారుగా సేవలందించారు. ఆయన సుమన్ బెరీ (Suman Bery) స్థానంలో బాధ్యతలు స్వీకరించారు. ఏప్రిల్ 25, 2026న ప్రధాని మోడీని కలిసి తన పదవీకాలాన్ని ప్రారంభించారు. ఆర్థిక రంగంలో 40 ఏళ్లకు పైగా అనుభవం ఉన్న లాహిరి రాకతో దేశ ఆర్థిక వ్యూహాలకు మరింత బలం చేకూరనుందని భావిస్తున్నారు.
5 కొత్త పూర్తిస్థాయి సభ్యుల నియామకం
ఈ పునర్వ్యవస్థీకరణలో భాగంగా ప్రభుత్వం 5 మంది కొత్త పూర్తిస్థాయి సభ్యులను కూడా నియమించింది. మాజీ కేబినెట్ కార్యదర్శి రాజీవ్ గౌబా (Rajiv Gauba), వ్యవసాయ నిపుణుడు ప్రొఫెసర్ కె.వి. రాజు (Prof. K.V. Raju), ప్రముఖ రోగనిరోధక శాస్త్రవేత్త ప్రొఫెసర్ గోబర్ధన్ దాస్ (Prof. Gobardhan Das), విజ్ఞాన సాంకేతిక విభాగ కార్యదర్శి ప్రొఫెసర్ అభయ్ కరందీకర్ (Prof. Abhay Karandikar), ఢిల్లీ వైద్య సంస్థ డైరెక్టర్ డాక్టర్ ఎం. శ్రీనివాస్ (Dr. M. Srinivas) సభ్యులుగా బాధ్యతలు చేపట్టారు.
సహకార సమాఖ్య స్ఫూర్తిని బలోపేతం చేస్తూ, వికసిత్ భారత్ 2047 (Viksit Bharat 2047) లక్ష్య సాధన దిశగా దీర్ఘకాలిక వ్యూహాలు, వినూత్న సంస్కరణలను రూపొందించడంలో ఈ కొత్త బృందం కీలక పాత్ర పోషించనుంది.
