అమరావతి పేరుతో భారీ అవినీతి – వైయస్ జగన్

ఆంధ్రప్రదేశ్ (Andhra Pradesh) రాజకీయాల్లో (Politics) మరోసారి అమరావతి (Amaravati) అంశం హాట్‌టాపిక్‌గా మారింది. వైఎస్సార్‌సీపీ(YSRCP) అధినేత, మాజీ ముఖ్యమంత్రి వైఎస్ జగన్ (Y. S. Jagan Mohan Reddy) తాడేపల్లిలో నిర్వహించిన మీడియా సమావేశంలో చేసిన వ్యాఖ్యలు ఇప్పుడు పెద్ద చర్చకు దారితీశాయి. అమరావతి పేరుతో జరుగుతున్న అభివృద్ధి పనుల వెనుక భారీ అవినీతి దాగి ఉందని ఆయన తీవ్ర ఆరోపణలు చేశారు.

అమరావతి ప్రాజెక్టులో రోడ్లు (Roads), డ్రైనేజీలు (Drainage Systems), ఫ్లైఓవర్లు (Flyovers) వంటి పనుల ఖర్చులు అసాధారణంగా పెరిగాయని జగన్ పేర్కొన్నారు. ఒక కిలోమీటర్ ఫ్లైఓవర్‌కు రూ.170 కోట్లు ఖర్చు చేస్తున్నారని, తమ హయాంలో అదే పనిని చాలా తక్కువ వ్యయంతో కేవలం 30 కొట్లతో పూర్తి చేశామని ఆయన గుర్తుచేశారు. అలాగే డిజైన్లకే వందల కోట్ల రూపాయలు ఖర్చు చేస్తున్నారని ప్రశ్నించారు.

టెండర్ల విషయంలో కూడా పెద్ద ఎత్తున అక్రమాలు జరిగాయని జగన్ ఆరోపించారు. పాత టెండర్లను రద్దు చేసి మళ్లీ అదే కంపెనీలకు పనులు అప్పగించడం, రేట్లు పెంచడం వంటి చర్యలు మాఫియా విధానాలను తలపిస్తున్నాయని విమర్శించారు. భూమి, ఇసుక, విద్యుత్, పన్నుల మినహాయింపులతో కొందరికి అసాధారణంగా లాభాలు చేకూరుస్తున్నారని చెప్పారు.

ఇక అమరావతి కోసం భారీగా అప్పులు (Loans) తీసుకోవడం వల్ల రాష్ట్ర ఆర్థిక పరిస్థితి దెబ్బతింటోందని జగన్ పేర్కొన్నారు. ఫీజు రీయింబర్స్‌మెంట్‌ (Fee Reimbursement), ఆరోగ్యశ్రీ (Aarogyasri Scheme), విద్య, వైద్య రంగాలకు సంబంధించిన పథకాలు నిలిచిపోయాయని ఆరోపించారు. ప్రభుత్వ బాధ్యతలైన సంక్షేమ కార్యక్రమాలు ఆగిపోవడం ప్రజలపై ప్రభావం చూపుతోందని అన్నారు.

అమరావతిపై వైఎస్సార్‌సీపీకి వ్యతిరేకత లేదని స్పష్టం చేసిన జగన్, ఏ ప్రాంతానికీ తమ పార్టీ వ్యతిరేకం కాదని తెలిపారు. కానీ రాజధాని పేరుతో జరుగుతున్న అవినీతిని ప్రశ్నించడం తమ బాధ్యత అని చెప్పారు. ప్రజలను మభ్యపెట్టేలా పెద్ద పెద్ద హామీలు ఇస్తూ, వాస్తవాలను దాచిపెట్టే ప్రయత్నం జరుగుతోందని విమర్శించారు.

అమరావతి నిర్మాణానికి లక్షల కోట్ల రూపాయలు అవసరమవుతాయని, ఆ డబ్బు ఎక్కడి నుంచి వస్తుందో ప్రభుత్వం స్పష్టత ఇవ్వాలని జగన్ డిమాండ్ చేశారు. ఇప్పటికే ఉన్న భూముల అభివృద్ధి కూడా పూర్తికాకముందే కొత్త ప్రణాళికలు ఎందుకు తీసుకువస్తున్నారో ప్రశ్నించారు.

మొత్తంగా అమరావతి అంశం రాజకీయంగా మరింత వేడెక్కే సూచనలు కనిపిస్తున్నాయి. జగన్ చేసిన ఈ ఆరోపణలకు అధికార పార్టీ ఎలా స్పందిస్తుందో చూడాలి. ప్రజలకు నిజాలు తెలియాల్సిన అవసరం ఉందని ఆయన స్పష్టం చేశారు.