ఆంధ్రప్రదేశ్ (Andhra Pradesh) అసెంబ్లీ బడ్జెట్ సమావేశాలకు (Assembly Budget Sessions) అన్ని ఏర్పాట్లు పూర్తయ్యాయి. రేపు ఉదయం 10 గంటలకు సమావేశాలు ప్రారంభం కానుండగా, 10.30 గంటలకు ఉభయ సభలను ఉద్దేశించి గవర్నర్ ప్రసంగించనున్నారు. సుమారు గంటపాటు ఈ ప్రసంగం సాగనుంది. అనంతరం 11.30 గంటలకు బిజినెస్ అడ్వైజరీ కమిటీ (BAC) సమావేశం జరగనుంది.
ఈ బడ్జెట్ సమావేశాలకు మాజీ ముఖ్యమంత్రి, వైసీపీ అధ్యక్షుడు వైఎస్ జగన్ మోహన్ రెడ్డి (Y.S. Jagan Mohan Reddy) హాజరుకానున్నారు. గవర్నర్ ప్రసంగం సమయంలో జగన్తో పాటు వైసీపీ ఎమ్మెల్యేలు అసెంబ్లీకి వచ్చే అవకాశం ఉందని పార్టీ వర్గాలు చెబుతున్నాయి. దాదాపు 20 రోజుల పాటు సమావేశాలు జరిగే అవకాశాలు కనిపిస్తున్నాయి.
సభలో అనుసరించాల్సిన వ్యూహంపై ఇప్పటికే వైసీపీ కీలక నేతలు చర్చలు జరుపుతున్నారు. కూటమి ప్రభుత్వం తీసుకుంటున్న నిర్ణయాలు, వైసీపీ నేతలపై జరుగుతున్న దాడులు, తిరుమల లడ్డూ వ్యవహారంపై (Tirumala Laddu Issue) ప్రభుత్వ వైఖరికి వ్యతిరేకంగా ఎలా స్పందించాలన్న అంశాలపై పార్టీ కసరత్తు చేస్తోంది. ఈ నేపథ్యంలో రేపు మధ్యాహ్నం జగన్ అధ్యక్షతన వైసీపీ శాసనసభా పక్ష సమావేశం జరగనుంది.
గత ఏడాది బడ్జెట్ సమావేశాల తొలి రోజున మాత్రమే జగన్ అసెంబ్లీకి హాజరైన సంగతి తెలిసిందే. ఈసారి కూడా మొదటి రోజుకే పరిమితం అయ్యే అవకాశం ఉందని పార్టీ వర్గాలు భావిస్తున్నాయి. అయితే శాసనమండలి సమావేశాలకు మాత్రం వైసీపీ సభ్యులు యథావిధిగా హాజరవుతారని సమాచారం.
కూటమి ప్రభుత్వ వైఫల్యాలను అసెంబ్లీ వేదికగా ప్రజల ముందుకు తీసుకెళ్లడమే వైసీపీ ప్రధాన లక్ష్యంగా కనిపిస్తోంది. శాసనసభా పక్ష సమావేశం అనంతరం పార్టీ తన తుది నిర్ణయాన్ని అధికారికంగా వెల్లడించనుంది.
