రాష్ట్ర రాజకీయాల్లో మరోసారి వేడి పెరిగింది. మాజీ మంత్రి జీవన్ రెడ్డి (Jeevan Reddy) సీఎం Revanth Reddy పాలనపై తీవ్ర అసంతృప్తి వ్యక్తం చేస్తూ సంచలన వ్యాఖ్యలు చేశారు. కేవలం 2 ఏళ్ల పాలనలోనే మార్పు రావాలనే పరిస్థితి ఏర్పడిందని అన్నారు. గతంలో కూడా మార్పు కోసం ప్రజలు కాంగ్రెస్కు ఓటు వేశారని గుర్తుచేశారు.
కాళేశ్వరం పై 500 కోట్లు ఖర్చుతో పునరుద్ధరణ సాధ్యం
జగిత్యాలలో (Jagtial) నిర్వహించిన మీడియా సమావేశంలో మాట్లాడుతూ, కాళేశ్వరం ప్రాజెక్ట్ (Kaleshwaram Project) పునరుద్ధరణలో ప్రభుత్వం పూర్తిగా విఫలమైందని జీవన్ రెడ్డి ఆరోపించారు. మేడిగడ్డ (Medigadda), అన్నారం (Annaram), సుందిల్ల బ్యారేజీలు (Sundilla Barrages) మొత్తం ప్రాజెక్ట్లో చిన్న భాగమేనని పేర్కొన్నారు. ఈ మూడు బ్యారేజీల పునరుద్ధరణకు కేవలం రూ.500 కోట్లలోపే ఖర్చవుతుందని, అయినప్పటికీ ప్రభుత్వం చర్యలు తీసుకోలేదని విమర్శించారు.
నేషనల్ డ్యామ్ సేఫ్టీ అథారిటీ (National Dam Safety Authority) నివేదిక వచ్చినా అమలు చేయలేదని, ప్రాణహిత జలాల వినియోగంలో కూడా ప్రభుత్వం విఫలమైందని అన్నారు. బడ్జెట్లో కేవలం రూ.152 కోట్లు మాత్రమే కేటాయించడం నిర్లక్ష్యానికి ఉదాహరణగా పేర్కొన్నారు. సుమారు 100 టీఎంసీల నీటి లభ్యత ఉన్నప్పటికీ వినియోగంలోకి తీసుకురాలేదని తెలిపారు.
కాళేశ్వరం ప్రాజెక్ట్ తెలంగాణకు కీలకమని, హైదరాబాద్ తాగునీరు, పరిశ్రమలు, మూసి శుద్ధి అన్నీ దీనిపైనే ఆధారపడుతున్నాయని చెప్పారు. మేడిగడ్డ పునరుద్ధరణ జరగకపోతే దాదాపు 18 లక్షల ఎకరాల సాగు భూమి ప్రభావితమవుతుందని హెచ్చరించారు.
త్వరలోనే రాజకీయ నిర్ణయం
ఇటీవల కాంగ్రెస్ పార్టీకి (Congress Party) రాజీనామా చేసిన జీవన్ రెడ్డి, భవిష్యత్ రాజకీయ నిర్ణయం మరో 2 వారాల్లో తీసుకుంటానని తెలిపారు. ప్రజా సేవ కోసం ఏదో ఒక పార్టీలో చేరాల్సిందేనని, తన అభిమానులు, అనుచరుల అభిప్రాయం మేరకు నిర్ణయం తీసుకుంటానన్నారు.
తనపై BJP మరియు BRS నాయకులు చూపుతున్న అభిమానానికి కృతజ్ఞతలు తెలిపారు. తాజా వ్యాఖ్యలతో ఆయన బీఆర్ఎస్(BRS) వైపు మొగ్గు చూపుతున్నారన్న రాజకీయ వర్గాల్లో చర్చ మొదలైంది.
