జువ్వలదిన్నె హార్బర్‌ను ప్రవేటు పరం చేస్తున్నారా?

రాష్ట్రవ్యాప్తంగా 555 మత్స్యకార గ్రామాల్లో (Fishermen Villages) సుమారు 6.8 లక్షల మంది మత్స్యకారులకు ప్రయోజనం చేకూర్చే లక్ష్యంతో గత వైఎస్సార్‌సీపీ ప్రభుత్వం (YSRCP Government) సుమారు రూ.3,500 కోట్ల వ్యయంతో పది ఫిషింగ్ హార్బర్లు (Fishing Harbours), ఆరు ఫిష్ హ్యాండ్లింగ్ సెంటర్ల (Fish Handling Centres) నిర్మాణానికి శ్రీకారం చుట్టింది. ఈ ప్రాజెక్టుల్లో భాగంగా నిర్మించిన తొలి హార్బర్ అయిన జువ్వలదిన్నె ఫిషింగ్ హార్బర్ (Juvvaladinne Fishing Harbour) 2024 ఆగస్టు నాటికే పూర్తయి మత్స్యకారులకు అందుబాటులోకి రావాల్సి ఉంది. అయితే ప్రస్తుతం ఈ హార్బర్ భవిష్యత్తుపై అనేక సందేహాలు వ్యక్తమవుతున్నాయి.

నెల్లూరు జిల్లా బోగోలు మండలం జువ్వలదిన్నె వద్ద కేంద్ర–రాష్ట్ర ప్రభుత్వాల సంయుక్త భాగస్వామ్యంతో రూ.288.8 కోట్ల వ్యయంతో 76.89 ఎకరాల్లో ఈ హార్బర్ అభివృద్ధి చేయబడింది. ఈ ప్రాజెక్టును 2024 ఆగస్టులో మహారాష్ట్రలోని పాలఘర్ నుంచి ప్రధాని నరేంద్ర మోదీ (Prime Minister Narendra Modi) వర్చువల్‌గా ప్రారంభించారు. ఈ హార్బర్ ద్వారా ఏటా సుమారు 41,250 టన్నుల మత్స్య సంపద లభించడంతో పాటు దాదాపు 25 వేల మత్స్యకార కుటుంబాలకు ప్రత్యక్ష లాభం కలగనుంది.

ఇప్పటివరకు జీవనోపాధి కోసం పొరుగు రాష్ట్రాలకు వలస వెళ్లాల్సి వచ్చిన మత్స్యకారులకు ఇక్కడే అధునాతన మెకనైజ్డ్ బోట్లతో చేపలు పట్టే అవకాశాలు ఏర్పడతాయని ఆశించారు. అయితే హార్బర్ నిర్మాణం పూర్తయినప్పటికీ ఇప్పటివరకు మత్స్యకారుల వినియోగానికి పూర్తిగా అందుబాటులోకి రాకపోవడం స్థానికుల్లో అసంతృప్తిని కలిగిస్తోంది.

ఇదే సమయంలో హార్బర్‌కు కేటాయించిన 76.89 ఎకరాల్లో 29.58 ఎకరాలను నౌకా నిర్మాణ కేంద్రంగా మార్చుతూ ముంబైకు చెందిన సాగర్ డిఫెన్స్ ఇంజనీరింగ్ లిమిటెడ్ (Sagar Defence Engineering Limited) అనే ప్రైవేట్ సంస్థకు కేటాయించాలనే నిర్ణయం మత్స్యకారుల్లో చర్చకు దారితీసింది. ఈ సంస్థ జువ్వలదిన్నెలో అటానమస్ మారిటైమ్ షిప్‌యార్డ్ యూనిట్ సిస్టమ్స్ సెంటర్‌ను (Autonomous Maritime Shipyard Unit Systems Center) ఏర్పాటు చేసి, ఆర్టిఫిషియల్ ఇంటెలిజెన్స్ ఆధారంగా పనిచేసే మానవ రహిత ఉపరితల వాహనాలు మరియు నీటి అడుగున తిరిగే వాహనాలను అభివృద్ధి చేయాలని ప్రణాళిక రూపొందించింది.

ఈ ప్రాజెక్టు కోసం తొలి దశలో రూ.45 కోట్ల పెట్టుబడి పెట్టనున్నట్లు అధికారులు తెలిపారు. ప్రారంభంగా 29.58 ఎకరాలు కేటాయించినప్పటికీ భవిష్యత్తులో మొత్తం 150 ఎకరాలు ఇవ్వనున్నట్లు అమరావతిలో జరిగిన కలెక్టర్ల సమావేశంలో ప్రస్తావన రావడం మత్స్యకారుల్లో ఆందోళనకు కారణమైంది. తమ కోసం నిర్మించిన హార్బర్ ప్రైవేటు సంస్థల ఆధీనంలోకి వెళ్లిపోతుందేమో అన్న భయం వారిలో వ్యక్తమవుతోంది.

ఈ ప్రాజెక్టు ద్వారా ప్రత్యక్షంగా, పరోక్షంగా వెయ్యి మందికి పైగా యువతకు ఉపాధి అవకాశాలు లభిస్తాయని ఐటీ శాఖ మంత్రి నారా లోకేష్(Nara Lokesh) పేర్కొన్నప్పటికీ, మత్స్యకారుల ఉపాధిపై ఎలాంటి ప్రభావం ఉంటుందో ప్రభుత్వం నుంచి స్పష్టమైన హామీ రాలేదని వారు చెబుతున్నారు. కూటమి ప్రభుత్వం అధికారంలోకి వచ్చిన తర్వాత ఇప్పటివరకు ఏ ఒక్క ఫిషింగ్ హార్బర్‌ను పూర్తిగా వినియోగంలోకి తీసుకురాలేదని, గత ప్రభుత్వం చేపట్టిన ప్రాజెక్టులు కూడా ప్రైవేటు సంస్థలకు అప్పగిస్తే తమ భవిష్యత్తు ఏమవుతుందో అన్న ఆందోళన వ్యక్తమవుతోంది.

ఇదిలా ఉండగా దుగ్గరాజపట్నంలో సుమారు 2000 ఎకరాల్లో రూ.29,662 కోట్ల అంచనా వ్యయంతో మెగా షిప్ బిల్డింగ్ క్లస్టర్ మరియు గ్రీన్ ఫీల్డ్ పోర్టు నిర్మాణానికి రాష్ట్ర ప్రభుత్వం ఆమోదం తెలిపింది. ఈ ప్రతిష్టాత్మక ప్రాజెక్టు దేశీయ నౌకా నిర్మాణ సామర్థ్యాన్ని పెంచడంతో పాటు వేలాది మందికి ఉపాధి అవకాశాలు కల్పిస్తుందని ప్రభుత్వం పేర్కొంటోంది.

ఈ నేపథ్యంలో సాగర్ డిఫెన్స్ ఇంజనీరింగ్ చేపట్టనున్న ప్రాజెక్టును దుగ్గరాజపట్నం వంటి ప్రణాళికలో ఉన్న షిప్ బిల్డింగ్ క్లస్టర్ ప్రాంతంలోనే ఏర్పాటు చేసే అవకాశం ఉండగా, జువ్వలదిన్నె హార్బర్ ప్రాంతాన్నే ఎందుకు ఎంపిక చేశారనే ప్రశ్నలు పలువురు నిపుణులు లేవనెత్తుతున్నారు.

ఇప్పటికే నిర్మాణం పూర్తయిన జువ్వలదిన్నె హార్బర్‌ను మత్స్యకారులు జీవనోపాధి కోసం వినియోగించుకునేలా చేయకుండా ఆ భూములను ప్రైవేటు సంస్థలకు కేటాయిస్తున్నారనే అభిప్రాయం స్థానికుల్లో వ్యక్తమవుతోంది. ఈ అంశంపై ప్రభుత్వం స్పష్టమైన వివరణ ఇవ్వాలని మత్స్యకారులు కోరుతున్నారు.