శ్రీ సత్యసాయి జిల్లా కదిరిలో (Kadiri) లక్ష్మీనరసింహస్వామి రథోత్సవం (Lakshmi Narasimha Swamy Rathotsavam) రాజకీయ ఉద్రిక్తతలకు వేదికగా మారింది. టీడీపీ ఎమ్మెల్యే కందికుంట ప్రసాద్ (Kandikunta Prasad) మరియు బీజేపీ నేత విష్ణువర్ధన్రెడ్డి (Vishnuvardhan Reddy) మధ్య విభేదాలు తీవ్ర చర్చకు దారి తీశాయి. రథోత్సవంలో పాల్గొనవద్దని విష్ణువర్ధన్రెడ్డిపై టీడీపీ ఎమ్మెల్యే ఆంక్షలు విధించడంతో వివాదం మరింత వేడెక్కింది.
గత మూడుదశాబ్దాలుగా లక్ష్మీనరసింహస్వామి రథోత్సవంలో పాల్గొంటున్నానని, ఇప్పుడే అకస్మాత్తుగా తనపై ఆంక్షలు విధించడం అన్యాయం అని బీజేపీ నేత విష్ణువర్ధన్రెడ్డి ఆగ్రహం వ్యక్తం చేశారు. ఎమ్మెల్యే నిర్ణయాన్ని తాను లెక్కచేయనని కూడా స్పష్టం చేశారు. ఈ పరిస్థితుల్లో విష్ణువర్ధన్రెడ్డి రథోత్సవంలో పాల్గొనకుండా ఉండేందుకు పోలీసులు ముందస్తు చర్యలు చేపట్టారు.
రథోత్సవానికి హాజరుకావడానికి అనుమతి ఇవ్వకపోవడంతో పాటు విష్ణువర్ధన్రెడ్డిని పోలీసులు హౌస్ అరెస్ట్ చేసినట్లు సమాచారం. దీంతో కదిరిలో టీడీపీ–బీజేపీ (TDP-BJP) నేతల మధ్య ఆధిపత్య పోరు తారాస్థాయికి చేరింది.
ఇటీవలి సంవత్సరాల్లో రథోత్సవ సమయంలో భక్తులకు మార్గనిర్దేశం చేస్తూ వస్తున్న విష్ణువర్ధన్రెడ్డిని ఈసారి కార్యక్రమానికి దూరంగా ఉంచాలని టీడీపీ వర్గాలు ప్రయత్నించినట్లు తెలుస్తోంది. ఒకవేళ బీజేపీ నేతలు ఉత్సవానికి వస్తే ఉద్రిక్త పరిస్థితులు తలెత్తే అవకాశముందని, టీడీపీ శ్రేణులు ప్రతిఘటనకు సిద్ధమయ్యారన్న ప్రచారం కూడా జరుగుతోంది. ఈ పరిణామాల నేపథ్యంలో కదిరిలో రాజకీయ వాతావరణం మరింత ఉద్రిక్తంగా మారింది.
