కాకినాడ జిల్లాలోని (Kakinada District) సామర్లకోట వేట్లపాలెంలో (Vetlapalem) ఉన్న సూర్యశ్రీ బాణాసంచా కేంద్రంలో చోటుచేసుకున్న ఘోర పేలుడు ప్రమాదం (Massive Explosion Accident) రాష్ట్రవ్యాప్తంగా కలకలం రేపింది. ఈ ఘటనకు నిబంధనల ఉల్లంఘనలే కారణమని డిప్యూటీ సీఎం పవన్ కళ్యాణ్ (Pawan Kalyan) అంగీకరించినట్లు సమాచారం వెలువడుతోంది. జనసేన అధికార సోషల్ మీడియా ఖాతా ద్వారా విడుదలైన ప్రకటనలో, 8 మంది మాత్రమే పని చేయాల్సిన ప్రదేశంలో 31 మందితో పనులు చేయించారని పేర్కొంటూ, భవిష్యత్తులో ఇలాంటి ఘటనలు పునరావృతం కాకుండా నిబంధనలు కఠినతరం చేస్తామని హామీ ఇచ్చారు.
అయితే పదేపదే ఇలాంటి ప్రమాదాలు జరుగుతున్నప్పటికీ ప్రభుత్వం సరైన పర్యవేక్షణ చర్యలు తీసుకోవడం లేదనే విమర్శలు గట్టిగా వినిపిస్తున్నాయి. 2025 అక్టోబర్లో కోనసీమ జిల్లాలో జరిగిన మరో బాణాసంచా పేలుడు ఘటనలో ఆరుగురు దుర్మరణం చెందిన విషయం గుర్తుకు వస్తోంది. ఆ సందర్భంలో ఆర్ఎఫ్వో స్వామి, జిల్లాలో ఉన్న 20 కర్మాగారాలలో 19 కేంద్రాలకు అనుమతుల విషయంలో అభ్యంతరాలున్నాయని వెల్లడించారు. అప్పుడు ప్రభుత్వం రాష్ట్రవ్యాప్తంగా తనిఖీలు చేపట్టివుంటే, ప్రస్తుత ఘటనను నివారించగలిగేదా అనే ప్రశ్న సామాన్య ప్రజల నుండి వ్యక్తమవుతోంది.
ప్రమాదం జరిగినప్పుడల్లా ప్రకటనలు చేసి పరిమితమవడం కాకుండా, దీర్ఘకాలిక పర్యవేక్షణ వ్యవస్థను అమలు చేయాల్సిన బాధ్యత ప్రభుత్వానిదే కాదా అని మృతుల కుటుంబ సభ్యులు ఆవేదన వ్యక్తం చేస్తున్నారు. ప్రభుత్వ నిర్లక్ష్యం (Government Negligence) వల్లే ఈ వరుస ప్రమాదాలు జరుగుతున్నాయనే ఆరోపణల మధ్య, డిప్యూటీ సీఎం పవన్ కళ్యాణ్ అధికారులపై బాధ్యత నెట్టివేస్తున్నారనే విమర్శలు కూడా వినిపిస్తున్నాయి.
2025 అక్టోబర్లో జరిగిన ప్రమాదం తరువాత ఇప్పటివరకు ప్రభుత్వం తీసుకున్న స్పష్టమైన చర్యలు ఏమిటి? భవిష్యత్తులో ఇలాంటి ఘటనలు నివారించేందుకు సమగ్ర ప్రణాళిక ఏదైనా ఉందా? అనే ప్రశ్నలకు ప్రభుత్వం సమాధానం ఇస్తుందా లేదా అన్నది వేచి చూడాల్సిందే.
