శ్రీకాకుళం జిల్లా టెక్కలి నియోజకవర్గంలోని మూలపేట పోర్ట్ పనులు వేగవంతం చేయాలని ఉత్తరాంధ్ర వైఎస్సార్సీపీ శ్రేణుల ఆధ్వర్యంలో నౌపాడలో భారీ బహిరంగ సభ నిర్వహించబడింది. ఈ సభకు ఉత్తరాంధ్ర ప్రాంతం నలుమూలల నుంచి భారీగా ప్రజలు తరలివచ్చారు. ప్రాంతీయ అభివృద్ధి, రాజకీయ ఆరోపణలు, మరియు ప్రభుత్వ పాత్రపై పలువురు నేతలు తీవ్ర వ్యాఖ్యలు చేశారు.
మాజీ మంత్రి ధర్మాన ప్రసాదరావు మాట్లాడుతూ, చిత్తశుద్ధి లేని ప్రభుత్వం వెనుకబడిన ప్రాంతాలపై అన్యాయం చేస్తోందని ఆరోపించారు. రాష్ట్రంలో సంపదను సమానంగా పంపిణీ చేయాల్సిన అవసరం ఉందని పేర్కొన్నారు. టీడీపీ ప్రభుత్వం శ్రీకాకుళం జిల్లాకు శాశ్వత అభివృద్ధి చేయలేదని విమర్శించారు. ప్రజలను ఎల్లో మీడియా మోసం చేస్తోందని, ప్రజలు అప్రమత్తంగా ఉండాలని సూచించారు.
బొత్స సత్యనారాయణ మాట్లాడుతూ, మూలపేట పోర్ట్ కేవలం ఒక ప్రాంతానికి కాదు, మొత్తం రాష్ట్ర అభివృద్ధికి కీలకమని అన్నారు. వైఎస్ జగన్ దూరదృష్టితో ఈ ప్రాజెక్ట్ను ప్రారంభించారని, కానీ ప్రస్తుత ప్రభుత్వం దానిని పట్టించుకోవడం లేదని విమర్శించారు. భోగాపురం ఎయిర్పోర్ట్ సహా పలు ప్రాజెక్టులపై క్రెడిట్ రాజకీయాలు జరుగుతున్నాయని ఆరోపించారు.
మాజీ మంత్రి సీదిరి అప్పలరాజు మాట్లాడుతూ, చంద్రబాబు నాయకత్వంలో పోర్ట్ పనులు జరిగాయని చెప్పడం సిగ్గుచేటని అన్నారు. జగన్ హామీ ఇచ్చి, అధికారంలోకి వచ్చిన తర్వాత అమలు చేసిన ప్రాజెక్ట్ ఇదని పేర్కొన్నారు. దశాబ్దాలుగా పెండింగ్లో ఉన్న ఈ ప్రాజెక్ట్ను పూర్తి చేసిన ఘనత జగన్కే చెందుతుందని తెలిపారు.
ధర్మాన కృష్ణదాస్ మాట్లాడుతూ, భావనపాడు పోర్ట్ పేరుతో టీడీపీ ప్రజలను మోసం చేసిందని ఆరోపించారు. ఉత్తరాంధ్ర ప్రజలను ఓటు బ్యాంకుగా మాత్రమే ఉపయోగించారని విమర్శించారు. జగన్ పాలనలో మూలపేట పోర్ట్, భోగాపురం ఎయిర్పోర్ట్, ఉద్దానం కిడ్నీ రీసెర్చ్ సెంటర్ వంటి కీలక ప్రాజెక్టులు రూపుదిద్దుకున్నాయని అన్నారు.
పాముల పుష్పశ్రీవాణి మాట్లాడుతూ, మూలపేట పోర్ట్ దశాబ్దాల కల అని, దాన్ని జగన్ నిజం చేశారని పేర్కొన్నారు. పనుల్లో 70 శాతం పూర్తి చేసినప్పటికీ మిగతా పనులు పూర్తి చేయడంలో ప్రభుత్వం విఫలమైందని విమర్శించారు. కురసాల కన్నబాబు మాట్లాడుతూ, క్రెడిట్ దోపిడీ రాజకీయాల్లో చంద్రబాబు ముందున్నారని విమర్శించారు. ఉత్తరాంధ్ర అభివృద్ధికి అడ్డంకులు సృష్టిస్తున్నారని ఆరోపించారు.
కొండా రాజీవ్ మాట్లాడుతూ, ఉత్తరాంధ్రలో వలసలను అరికట్టాలని జగన్ సంకల్పించారని, ఈ ప్రాంతానికి ఆయన ఊపిరి పోశారని అన్నారు. అమరావతిపై చూపుతున్న శ్రద్ధను ఉత్తరాంధ్రపై ఎందుకు చూపించడం లేదని ప్రశ్నించారు. ఎమ్మెల్సీ వరుదు కల్యాణి మాట్లాడుతూ, మూలపేట పోర్ట్ పూర్తిగా జగన్ సంకల్పంతో ముందుకు వెళ్లిందని, 70 శాతం పనులు పూర్తయ్యాయని తెలిపారు. మిగిలిన పనులను పూర్తి చేయకుండా క్రెడిట్ తీసుకోవడం తగదని అన్నారు.
ఈ సందర్భంగా వైఎస్సార్సీపీ నేతలు మూలపేట పోర్ట్కు ర్యాలీగా బయలుదేరి, విశాఖ జిల్లా అధ్యక్షుడు కేకే రాజు జెండా ఊపి ర్యాలీని ప్రారంభించారు. ఉత్తరాంధ్ర అభివృద్ధి కోసం పోరాటం కొనసాగిస్తామని నేతలు స్పష్టం చేశారు.
