కూటమి ప్రభుత్వం (Coalition Government) అధికారంలోకి వచ్చిన అనంతరం తిరుమల (Tirumala) లడ్డూ కల్తీ (Laddu Prasadam) ఆరోపణలు రాష్ట్ర రాజకీయాల్లో తీవ్ర కలకలం రేపిన విషయం తెలిసిందే. 2024 సెప్టెంబర్లో ప్రారంభమైన ఈ వివాదం క్రమంగా వేడెక్కి, దేశ అత్యున్నత న్యాయస్థానం అయిన సుప్రీం కోర్టు (Supreme Court of India) జోక్యం వరకు వెళ్లింది. సరైన ఆధారాలు లేకుండానే పవిత్రమైన తిరుమల లడ్డూలో గత ప్రభుత్వ హయాంలో జంతు కొవ్వు కలిపారనే ఆరోపణలు విస్తృత ప్రచారం పొందాయి. అయితే సుప్రీం కోర్టు పర్యవేక్షణలో జరిగిన సమగ్ర పరీక్షల్లో ఎలాంటి జంతు కొవ్వు ఆనవాళ్లు లేవని నివేదిక వెల్లడించడంతో రాజకీయ వాతావరణం ఒక్కసారిగా మారిపోయింది.
ఈ పరిణామాలతో కూటమి ప్రభుత్వంపై ప్రజల్లో ఆగ్రహం వ్యక్తమవుతోందనే అభిప్రాయం బలపడింది. పవిత్రతకు ప్రతీకగా భావించే లడ్డూపై నిరాధార ఆరోపణలు చేయడంపై అనేక వర్గాలు తీవ్రంగా స్పందించాయి. కొందరు నేతలు ఈ వివాదాన్ని రాజకీయ లబ్ధి కోసం వినియోగించుకునే ప్రయత్నం జరిగిందని ఆరోపిస్తూ నిరసనలు తెలిపారు.
ఇలాంటి పరిస్థితుల్లో అసెంబ్లీ సమావేశాల సందర్భంగా ఉప ముఖ్యమంత్రి పవన్ కళ్యాణ్ (Pawan Kalyan) “లడ్డూ కల్తీని గత ప్రభుత్వమే చేశారని నేను ఎప్పుడూ చెప్పలేదు” అని ప్రకటించడం రాజకీయ వర్గాల్లో సంచలనంగా మారింది. ఇప్పటివరకు జరిగిన ప్రచారానికి భిన్నంగా వచ్చిన ఈ ప్రకటనతో ఆయన పార్టీ శ్రేణులే ఆశ్చర్యానికి గురయ్యాయని రాజకీయ వర్గాల్లో చర్చ సాగుతోంది. మార్ఫింగ్ ఫోటోలు, ప్రచార పత్రాలు, సోషల్ మీడియా వ్యాఖ్యానాల నేపథ్యంలో ఒక్కసారిగా వచ్చిన ఈ మార్పు ప్రజా వ్యతిరేకత కారణంగానేనా అనే ప్రశ్నలు రాజకీయ వాతావరణాన్ని మారుస్తున్నాయి.
