ఆంధ్రప్రదేశ్ డిప్యూటీ సీఎం, నటుడు పవన్ కళ్యాణ్ నటిస్తున్న “ఉస్తాద్ భగత్ సింగ్” సినిమా ప్రీ రిలీజ్ ఈవెంట్లో చేసిన వ్యాఖ్యలు ప్రస్తుతం పెద్ద చర్చకు దారి తీశాయి. సినిమా సమాజానికి చాలా కీలకమని, సినిమా లేకపోతే సమాజంలో క్రైం పెరిగిపోతుందని ఆయన చేసిన వ్యాఖ్యలు వివాదానికి కేంద్రబిందువుగా మారాయి.
పవన్ కళ్యాణ్ చేసిన ఈ వ్యాఖ్యల నేపథ్యంలో, నిజంగానే సినిమాలు లేకపోతే సమాజంలో నేరాలు పెరుగుతాయా? లేక సినిమాల ప్రభావంతోనే నేరప్రవర్తనలు పెరుగుతున్నాయా? అనే ప్రశ్న మరోసారి ప్రజల్లో చర్చకు దారి తీసింది.
నిజానికి సామాజిక వేత్తలు, పౌరహక్కుల కార్యకర్తలు, మహిళా సంఘాల ప్రతినిధులు తరచూ సినిమాల ప్రభావంపై ఆందోళన వ్యక్తం చేస్తూ ఉంటారు. ముఖ్యంగా సినిమాల్లో నేరాలకు పాల్పడే వ్యక్తులను హీరోలుగా చూపించడం, హింసాత్మక దృశ్యాలు, మద్యం మరియు ధూమపానం వంటి అలవాట్లను ఆకర్షణీయంగా చూపించడం వలన యువతపై ప్రతికూల ప్రభావం పడుతోందని వారు అంటున్నారు. తక్కువ వయస్సులోనే హీరోల్ని అనుకరించే ప్రయత్నంలో యువత తప్పుదోవ పడే ప్రమాదం ఉందని, కుటుంబాల్లో సమస్యలు తలెత్తుతున్నాయని కూడా వారు హెచ్చరిస్తున్నారు.
భారీ దోపిడీలు, థ్రిల్లర్ కథాంశాలు ఆధారంగా తీసిన అనేక భారతీయ సినిమాలు నిజ జీవిత నేరాలకు ప్రేరణగా నిలిచిన ఉదాహరణలు కూడా ఉన్నాయని నిపుణులు చెబుతున్నారు. కొన్ని సందర్భాల్లో నేరస్థులు తమ ప్రణాళికలను అమలు చేయడానికి సినిమాల్లో చూపిన పద్ధతులు, కథాంశాలు లేదా పాత్రల నుండి ప్రేరణ పొందినట్లు కూడా పోలీస్ విచారణల్లో బయటపడింది.
ఉదాహరణకు “ధూమ్” సిరీస్ విడుదలైన తర్వాత అనేక దోపిడీ కేసులు వెలుగులోకి వచ్చాయి. ఉత్తరప్రదేశ్లోని సాహిబాబాద్లో జరిగిన ఒక దోపిడీ కేసులో నిందితులు ఈ సినిమా ద్వారా ప్రేరణ పొందినట్లు తెలిపారు. అలాగే “స్పెషల్ 26” సినిమా తరహాలో నకిలీ సీబీఐ అధికారులుగా నటిస్తూ హైదరాబాద్లోని ఒక ఫైనాన్స్ సంస్థ నుండి భారీ మొత్తంలో బంగారం దోచుకున్న ఘటన కూడా వెలుగులోకి వచ్చింది.
మలయాళ చిత్రం “దృశ్యం” కథాంశాన్ని అనుసరించి భోపాల్లో ఒక హత్యను కప్పిపుచ్చే ప్రయత్నం చేసిన ఘటన కూడా దేశవ్యాప్తంగా చర్చనీయాంశమైంది. “బంటీ ఔర్ బబ్లీ” చిత్రంలోని మోసగాళ్ల పాత్రల నుండి ప్రేరణ పొందిన జంట ఢిల్లీలో అనేక మోసాలకు పాల్పడిన ఘటనలు నమోదయ్యాయి.
అలాగే “పుష్ప: ది రైజ్” చిత్రంలో చూపిన స్మగ్లింగ్ పద్ధతులను అనుసరించి గంధపు చెక్కల అక్రమ రవాణాకు ప్రయత్నించిన ఘటనలు కూడా బయటపడ్డాయి. “షూటౌట్ ఎట్ లోఖండ్వాలా” సినిమా ప్రభావంతో కిడ్నాప్ చేసి హత్య చేసిన ఘటన కూడా పోలీస్ విచారణలో బయటపడింది. ఇటీవల విడుదలైన “ఫర్జీ” వెబ్ సిరీస్ ప్రభావంతో నకిలీ టిక్కెట్లు తయారు చేసి విక్రయించిన ఘటన కూడా నమోదైంది.
ఈ నేపథ్యంలో సినిమాలు సమాజంపై ప్రభావం చూపుతున్నాయనే వాదనకు కొన్ని ఉదాహరణలు కనిపిస్తున్నాయని విశ్లేషకులు చెబుతున్నారు. ఇలాంటి పరిస్థితుల్లో డిప్యూటీ సీఎం వంటి బాధ్యతాయుతమైన పదవిలో ఉన్న వ్యక్తి సినిమా లేకపోతే సమాజంలో నేరాలు పెరుగుతాయని వ్యాఖ్యానించడం సరైందా? అనే ప్రశ్నలు కూడా వినిపిస్తున్నాయి.
ఈ సందర్భంలో సినిమాల్లో హింసాత్మక మరియు నేర ప్రవర్తనకు ప్రోత్సాహం ఇచ్చే దృశ్యాలను తగ్గించాల్సిన అవసరం ఉందని పలువురు అభిప్రాయం వ్యక్తం చేస్తున్నారు. సినిమాల ప్రభావం సమాజంపై లేదని ఒకవైపు చెబుతూ, సినిమా లేకపోతే నేరాలు పెరుగుతాయని మరోవైపు చెప్పడం బాధ్యతారాహిత్యమైన వ్యాఖ్యగా ప్రజాసంఘాల ప్రతినిధులు విమర్శిస్తున్నారు.
