కాకినాడ (Kakinada) జిల్లా పిఠాపురం నియోజకవర్గంలో (Pithapuram Constituency) రాజకీయ వర్గాలను కుదిపేస్తున్న అంశంగా టిడిపి ఇన్ఛార్జి, మాజీ ఎమ్మెల్యే ఎస్విఎస్ఎన్ వర్మకు (SVSN Varma) చెందిన ఎస్విఎస్ కనస్ట్రక్షన్స్ సంస్థకు (SVS Constructions Company) భూముల కేటాయింపు (Lands Allotment) వ్యవహారం మారింది. టూరిజం పాలసీ 2024-29కు అనుగుణంగా, కాకినాడలో కన్వెన్షన్ సెంటర్తో పాటు 5 స్టార్ హోటల్ నిర్మాణం కోసం 3.4 ఎకరాల భూమిని ప్రభుత్వం కేటాయించడం గమనార్హం. ఈ ప్రాజెక్ట్కు సంబంధించిన జిఒ 17ను టూరిజం శాఖ విడుదల చేయడం ద్వారా అధికారికత వచ్చింది.
రూ.104 కోట్ల పెట్టుబడితో ప్రతిపాదించిన ఈ ప్రాజెక్ట్కు ఎస్ఐపిబి (SIPB) అనుమతి లభించగా, సుమారు 300 మందికి ఉపాధి అవకాశాలు కలుగుతాయని అధికారులు పేర్కొన్నారు. అయితే, ఈ ప్రాజెక్ట్కు పదేళ్ల పాటు ఎస్జిఎస్టి మినహాయింపు, ఐదేళ్ల పాటు విద్యుత్ డ్యూటీ మినహాయింపు వంటి ప్రత్యేక రాయితీలు ఇవ్వడం, అలాగే 66 ఏళ్లపాటు లీజు ప్రాతిపదికన భూమి కేటాయించడం వివాదాస్పదంగా మారింది.
ఇదే సమయంలో, పిఠాపురం నియోజకవర్గంలో టిడిపి-జనసేన (TDP-Jana Sena) మధ్య నెలకొన్న రాజకీయ ఉద్రిక్తతల నేపథ్యంలో ఈ నిర్ణయం మరింత చర్చనీయాంశంగా మారింది. ముఖ్యంగా డిప్యూటీ సీఎం పవన్ కళ్యాణ్(Pawan Kalyan) ప్రాతినిధ్యం వహిస్తున్న నియోజకవర్గంలో ఇసుక అక్రమ తవ్వకాలపై వర్మ చేసిన ఆరోపణలు, వాటిని సోషల్ మీడియాలో ప్రదర్శించడం అప్పట్లో పెద్ద చర్చకు దారి తీసింది.
అలాగే, వర్మకు ఎమ్మెల్సీ అవకాశం దక్కలేదనే అసంతృప్తి నేపథ్యంలో జనసేనపై విమర్శలు చేస్తున్నారనే అభిప్రాయాలు వినిపిస్తున్నాయి. మరోవైపు, పిఠాపురం ఇకపై పవన్ కళ్యాణ్ ఆధిపత్యంలోనే ఉంటుందని జనసేన శ్రేణులు భావిస్తున్నాయి.
ఈ పరిస్థితుల్లో, వర్మను రాజకీయంగా సంతృప్తి పరచేందుకు ప్రభుత్వం ఈ నిర్ణయం తీసుకుందా అనే సందేహాలు ప్రజల్లో వ్యక్తమవుతున్నాయి. జిల్లాలో ఇతర సంస్థలు కూడా ప్రతిపాదనలు సమర్పించినప్పటికీ, వర్మకు చెందిన సంస్థకు వేగంగా ఆమోదం లభించడం, విస్తృత రాయితీలు కల్పించడం వెనుక అసలు ఉద్దేశం ఏమిటి అనే ప్రశ్నలు ఇప్పుడు ఉత్పన్నమవుతున్నాయి.
