ప్రపంచంలో అత్యంత కీలకమైన ఓడల మార్గాల్లో ఒకటైన హర్ముజ్ జలసంధి (Strait of Hormuz) వద్ద ప్రస్తుతం అపూర్వ పరిస్థితులు నెలకొన్నాయి. వందలాది ఓడలు సముద్రంలో ఎక్కడికక్కడే నిలిచిపోవడంతో భారీ ట్రాఫిక్ జామ్ (Traffic Jam) ఏర్పడింది. విమానాల (Aircraft) నుంచి తీసిన ఏరియల్ ఫోటోలు (Aerial Photos), వీడియోలు సోషల్ మీడియాలో వైరల్ అవుతున్నాయి. ఈ దృశ్యాల్లో సముద్రం మొత్తం ఓడలతో నిండిపోయినట్లు కనిపిస్తోంది.
యుద్ధ ప్రభావం.. ఆయిల్ రవాణాపై తీవ్ర దెబ్బ
అమెరికా (United States), ఇజ్రాయెల్ (Israel), ఇరాన్ (Iran) మధ్య కొనసాగుతున్న యుద్ధం ప్రభావంతో ఇరాన్ హర్ముజ్ జలసంధిని దాదాపుగా బ్లాకేడ్ (Blockade) చేసింది. ఫలితంగా మార్చి నెలలో కేవలం 100 ఓడలు మాత్రమే ఈ మార్గం గుండా ప్రయాణించగలిగాయి. సాధారణంగా రోజుకు 100 నుంచి 140 ఓడలు వెళ్లే ఈ మార్గంలో ప్రస్తుతం ట్రాఫిక్ దాదాపు సున్నాకి చేరింది.
పర్షియన్ గల్ఫ్ ప్రాంతంలో లోపల, బయట కలిపి సుమారు 300 నుంచి 400 ఓడలు నిలిచిపోయినట్లు అంచనా. ఈ జలసంధి ద్వారా ప్రపంచంలో సుమారు 20 శాతం ఆయిల్, 20 శాతం ఎల్ఎన్జీ రవాణా జరుగుతుంది. ఈ మార్గం దాదాపు మూసుకుపోవడంతో ఆయిల్ ధరలు పెరగడం, ఎనర్జీ సరఫరాలో అంతరాయం ఏర్పడింది.
ఇక ఈ సంక్షోభం వల్ల సుమారు 40,000 మంది నావికులు ఓడలపైనే చిక్కుకుపోయారు. యుద్ధ పరిస్థితుల కారణంగా క్రూ మార్పిడి కూడా కష్టంగా మారింది. హర్ముజ్ జలసంధి ప్రపంచ ఆర్థిక వ్యవస్థకు (Global Economy) కీలక కేంద్రంగా ఉండటంతో ఇక్కడ పరిస్థితులు మరింత దిగజారితే గ్లోబల్ షిప్పింగ్ ఖర్చులు పెరగడం, ఇంధన సంక్షోభం తీవ్రమయ్యే అవకాశం ఉంది.
