ప్రపంచవ్యాప్తంగా ఉద్రిక్తతలకు కారణమైన ఇరాన్-అమెరికా (Iran-America) పరిస్థితుల్లో కీలక మలుపు చోటుచేసుకుంది. అమెరికా అధ్యక్షుడు (Donald Trump) ఇరాన్పై జరగాల్సిన దాడులను తాత్కాలికంగా నిలిపివేస్తున్నట్లు ప్రకటించారు. విద్యుత్ కేంద్రాలు (Power Plants), ఇంధన మౌలిక సదుపాయాలపై (Energy Infrastructure) జరగాల్సిన దాడులను ఐదు రోజుల పాటు ఆపాలని ఆదేశించారు.
చర్చలు సానుకూలం.. యుద్ధానికి తాత్కాలిక విరామం
గత కొన్ని రోజులుగా ఇరాన్ ప్రతినిధులతో అమెరికా రహస్య చర్చలు కొనసాగిస్తున్నట్లు సమాచారం. ఈ చర్చలు సానుకూల దిశగా సాగుతున్నాయని ట్రంప్ తెలిపారు. పూర్తిస్థాయి శాంతి సాధ్యమయ్యే అవకాశముందని ఆశాభావం వ్యక్తం చేశారు. చర్చలు కొనసాగుతున్న సమయంలో ఎలాంటి దాడులు చేయవద్దని అమెరికా రక్షణ శాఖకు (Pentagon) సూచించారు. అయితే ఈ విరామం చర్చల ఫలితాలపై ఆధారపడి ఉంటుందని స్పష్టం చేశారు.
ఇటీవల ఇరాన్ హోర్ముజ్ జలసంధిని (Hormuz Strait) మూసివేయడంతో ప్రపంచవ్యాప్తంగా చమురు సరఫరాపై (Oil Crisis) తీవ్ర ప్రభావం పడింది. ఈ నేపథ్యంలో ఆ జలసంధిని వెంటనే తెరవాలని అమెరికా హెచ్చరించింది. గడువు ముగియకముందే ఈ యుద్ధ విరామం ప్రకటించడం ప్రాధాన్యం సంతరించుకుంది.
పశ్చిమాసియాలో శాంతి నెలకొల్పడమే తమ లక్ష్యమని ట్రంప్ పేర్కొన్నారు. యుద్ధం వల్ల ప్రాణనష్టం, ఆర్థిక నష్టాలు పెరుగుతున్న నేపథ్యంలో ఈ నిర్ణయం తీసుకున్నట్లు విశ్లేషణలు వినిపిస్తున్నాయి. ఈ ఐదు రోజుల విరామం శాశ్వత శాంతికి దారితీస్తుందా లేదా అన్నది ఆసక్తికరంగా మారింది.
