విజయవాడ (Vijayawada) రాజకీయాల్లో మరోసారి ఊహాగానాలకు తెరలేపుతూ వంగవీటి రాధా (Vangaveeti Radha) చేసిన తాజా వ్యాఖ్యలు రాష్ట్ర రాజకీయ వర్గాల్లో తీవ్ర చర్చకు దారితీశాయి. కూటమి ప్రభుత్వ పాలనలో కాపు సామాజిక వర్గానికి తగిన ప్రాధాన్యత దక్కడం లేదనే అసంతృప్తి పెరుగుతున్న నేపథ్యంలో ఆయన వ్యాఖ్యలు మరింత ప్రాధాన్యం సంతరించుకున్నాయి. మాజీ మంత్రి అంబటి రాంబాబును (Ambati Rambabu) అరెస్ట్ చేయడం, ఆయన నివాసంపై దాడులు జరగడం వంటి పరిణామాలు కాపు నేతల్లో ఆవేదనను రేకెత్తించాయి. డిప్యూటీ సీఎం హోదాలో ఉన్న పవన్ కళ్యాణ్ (Pawan Kalyan) ఈ ఘటనలపై స్పష్టమైన స్పందన ఇవ్వకపోవడంపై కూడా ఆ వర్గంలో అసంతృప్తి వ్యక్తమవుతోందని రాజకీయ వర్గాలు చెబుతున్నాయి.
ఈ పరిస్థితుల్లో పోలవరంలో దివంగత నేత వంగవీటి రంగా విగ్రహ ఆవిష్కరణ కార్యక్రమంలో వంగవీటి రాధా చేసిన వ్యాఖ్యలు రాజకీయంగా కీలకంగా మారాయి. వైసీపీ నేతలైన దాడిశెట్టి రాజ, జక్కంపూడి గణేష్లకు ఆశీర్వాదం ఉండాలని కోరుతూ, వారు బలంగా ఉంటేనే ప్రజలకు సేవ చేయగలరని పేర్కొనడం అనేక అర్థాలకు దారి తీస్తోంది. ముఖ్యంగా తెలుగుదేశం పార్టీలో ఈ వ్యాఖ్యలు అలజడి రేపినట్టు ప్రచారం సాగుతోంది.
ఇప్పటికే వైసీపీ నేతలైన వల్లభనేని వంశీ, కోడాలి నానితో సన్నిహిత సంబంధాలు ఉన్న వంగవీటి రాధా, తాజా వ్యాఖ్యలతో రాజకీయంగా ఏ దిశగా పయనిస్తారన్నదే ఇప్పుడు ప్రధాన ప్రశ్నగా మారింది. కాపు సామాజిక వర్గానికి ఆయన సంకేతం ఇచ్చారా? లేక ఇది కేవలం వ్యక్తిగత అభిప్రాయమా? అన్నదానిపై రాష్ట్ర రాజకీయాల్లో ఉత్కంఠభరిత చర్చ కొనసాగుతోంది.
