నెల్లూరు జిల్లాను పోట్టి శ్రీరాములు జిల్లాగా చేసింది నేనే అంటున్న చంద్రబాబు – ఇందులో నిజం ఎంత?

తెలుగువారికి స్వంత రాష్ట్రం ఉండాలనే లక్ష్యంతో మద్రాస్ పాలన (Madras Presidency) నుండి ఆంధ్ర రాష్ట్రం (Andhra State) ఏర్పాటుకు ఆమరణ నిరాహారదీక్ష చేపట్టి ప్రాణత్యాగం చేసిన మహనీయుడు అమరజీవి పోట్టి శ్రీరాములు (Amarajeevi Potti Sriramulu). 58 రోజులపాటు కఠినమైన దీక్ష చేసి ప్రజల్లో ఉద్యమ స్పూర్తిని రగిలించి రాష్ట్ర సాధనకు మార్గం సుగమం చేసిన ఆయన త్యాగం తెలుగు చరిత్రలో చిరస్థాయిగా నిలిచింది. ఈ నేపథ్యంలో ఆయన 125వ జయంతి (125th Birth Anniversary) సందర్భంగా అమరావతిలో పోట్టి శ్రీరాములు 58 రోజుల దీక్షను స్మరించుకుంటూ 58 అడుగుల భారీ కాంస్య విగ్రహం “స్టాచ్యూ ఆఫ్ సాక్రిఫైస్” (Statue of Sacrifice) ను కూటమి ప్రభుత్వం ఆవిష్కరించింది.

ఈ కార్యక్రమం సందర్భంగా ఆంధ్రప్రదేశ్ ముఖ్యమంత్రి చంద్రబాబు నాయుడు (Nara Chandrababu Naidu) చేసిన వ్యాఖ్యలు ప్రస్తుతం రాజకీయ వర్గాల్లో మరియు సామాజిక మాధ్యమాల్లో పెద్ద చర్చకు దారితీశాయి. రాష్ట్రంలో జిల్లాలకు పోట్టి శ్రీరాములు గారి పేరు పెట్టింది తానే అని ఆయన చేసిన వ్యాఖ్యలు వైరల్ అవడంతో, నెల్లూరు జిల్లాకు (Nellore District) నిజంగా ఎవరు ఆ పేరు పెట్టారు అనే ప్రశ్న మళ్లీ చర్చనీయాంశంగా మారింది.

ఈ అంశంపై రాజకీయ వర్గాల్లో భిన్నాభిప్రాయాలు వ్యక్తమవుతున్నాయి. కొందరు నేతలు నెల్లూరు జిల్లాను పోట్టి శ్రీరాములు జిల్లాగా అధికారికంగా పేరు మార్చింది దివంగత ముఖ్యమంత్రి వైయస్ రాజశేఖర రెడ్డి (Dr. Y. S. Rajasekhara Reddy) హయాంలోనే అని చెబుతూ చంద్రబాబు వ్యాఖ్యలను ఖండిస్తున్నారు.

చరిత్రను పరిశీలిస్తే నెల్లూరు జిల్లాకు పోట్టి శ్రీరాములు పేరు పెట్టాలనే డిమాండ్ మొదటిసారి 1998 ఆగస్టులో నెల్లూరులో జరిగిన ఆర్యవైశ్య సంఘం సమావేశంలో దివంగత మాజీ ముఖ్యమంత్రి కె. రోశయ్య (K. Rosaiah) లేవనెత్తారు. అనంతరం 1999లో వైయస్ రాజశేఖర రెడ్డి ఈ డిమాండ్‌ను కాంగ్రెస్ పార్టీ ఎన్నికల మానిఫెస్టోలో చేర్చారు. కాంగ్రెస్ పార్టీ అధికారంలోకి వస్తే జిల్లాకు పోట్టి శ్రీరాములు (Potti Sriramulu Nellore District) గారి పేరు పెడతామని అప్పట్లో హామీ ఇచ్చారు. అయితే ఆ ఎన్నికల్లో కాంగ్రెస్ పార్టీ ఓటమి పాలవడంతో ఆ నిర్ణయం అమలుకాలేదు.

అయినా కూడా నెల్లూరు జిల్లాకు పోట్టి శ్రీరాములు పేరు పెట్టాలనే డిమాండ్ మాత్రం కొనసాగుతూనే వచ్చింది. తెలుగుదేశం పార్టీ అధికారంలో ఉన్న సమయంలో ఆర్యవైశ్య సంఘాలతో పాటు కాంగ్రెస్ నాయకులు కూడా ఈ అంశాన్ని తరచూ ప్రస్తావించారు.

ఈ నేపథ్యంలో 2002 నవంబర్ నెలలో జరిగిన అసెంబ్లీ సమావేశాల్లో వైయస్ రాజశేఖర రెడ్డి ఆధ్వర్యంలో జిల్లాకు పోట్టి శ్రీరాములు పేరు పెట్టాలనే తీర్మానం ప్రవేశపెట్టబడింది. అయితే ఆ రోజు ఆ తీర్మానం చర్చకు రాలేదు. మళ్లీ 2003 మార్చిలో ఇదే అంశంపై తీర్మానం ప్రవేశపెట్టినప్పుడు దీనిపై ప్రభుత్వం నిర్ణయం తీసుకుంటుందని చంద్రబాబు ప్రభుత్వం ప్రకటించింది.

తదనంతరం 2003 మార్చి 10న నెల్లూరు జిల్లాను “పొట్టి శ్రీరాములు నెల్లూరు జిల్లా” (Potti Sriramulu Nellore District)గా పేరు మార్చేందుకు ప్రభుత్వం నిర్ణయించిందని చంద్రబాబు ప్రభుత్వం ప్రకటించింది. అయితే ఆ ప్రకటన తర్వాత కూడా అధికారిక ప్రక్రియలు ముందుకు సాగలేదు. అదే సంవత్సరం నవంబర్‌లో ప్రభుత్వం రద్దు అయ్యే వరకు దాదాపు ఆరు నెలలు అధికారంలో ఉన్నప్పటికీ పేరు మార్పు అమలు కాలేదు. ఫలితంగా ఆ నిర్ణయం అప్పట్లో ప్రకటన స్థాయిలోనే నిలిచిపోయింది.

తర్వాత 2004లో వైయస్ రాజశేఖర రెడ్డి ముఖ్యమంత్రిగా బాధ్యతలు చేపట్టిన అనంతరం, కాంగ్రెస్ పార్టీ ఇచ్చిన హామీ ప్రకారం నెల్లూరు జిల్లాను “పొట్టి శ్రీరాములు నెల్లూరు జిల్లా”గా పేరు మార్చే నిర్ణయాన్ని అమలు చేశారు. ఈ మేరకు 2008 జూన్ 4న అధికారిక గెజెట్ విడుదల చేయడంతో ఆ రోజు నుండి జిల్లాకు అధికారికంగా పోట్టి శ్రీరాములు పేరు అమలులోకి వచ్చింది.

ఈ విధంగా చూస్తే నెల్లూరు జిల్లాకు పోట్టి శ్రీరాములు పేరు పెట్టాలనే డిమాండ్‌ను తొలుత రోశయ్య లేవనెత్తగా, దానిని వైయస్ రాజశేఖర రెడ్డి ఎన్నికల మానిఫెస్టోలో చేర్చారు. తరువాత చంద్రబాబు ప్రభుత్వం ఆ దిశగా ప్రకటన చేసినప్పటికీ అమలు కాలేదు. చివరికి 2008లో వైయస్ రాజశేఖర రెడ్డి ప్రభుత్వం అధికారిక గెజెట్ విడుదల చేసి జిల్లాకు పోట్టి శ్రీరాములు పేరు పెట్టడంతో ఆ మహనీయుడికి నిజమైన ఘన నివాళి అర్పించబడింది.