న్యూజిలాండ్లో (New Zealand) జరుగుతున్న ఎఫ్ఐహెచ్ (FIH) మహిళల నేషన్స్ కప్లో (Women’s Nations Cup) భారత మహిళల హాకీ జట్టు (India Women’s Hockey Team) అద్భుతమైన ప్రదర్శన కొనసాగిస్తోంది. వరుసగా 3వ విజయాన్ని నమోదు చేసిన భారత జట్టు గ్రూప్ దశను అజేయంగా ముగించి సెమీఫైనల్కు (Semi-final) మరింత ఆత్మవిశ్వాసంతో అడుగుపెట్టింది. గురువారం జరిగిన చివరి గ్రూప్ మ్యాచ్లో ఉరుగ్వేపై (Uruguay) 3-2 తేడాతో ఉత్కంఠభరిత విజయాన్ని అందుకుంది.
మ్యాచ్ ఆరంభంలోనే ఉరుగ్వే భారత్కు షాక్ ఇచ్చింది. 13వ నిమిషంలో కియారా అపెన్నినో గోల్ చేసి ఉరుగ్వేను 1-0తో ఆధిక్యంలో నిలిపింది. అయితే ఆ తర్వాత భారత ఆటగాళ్లు వేగం పెంచి ప్రత్యర్థిపై ఒత్తిడి పెంచారు. 24వ నిమిషంలో దీపిక సెహ్రావత్ (Deepika Sehrawat) అద్భుతమైన గోల్ చేసి స్కోరును 1-1తో సమం చేసింది.
సెకండ్ హాఫ్లో భారత్ పూర్తి ఆధిపత్యాన్ని ప్రదర్శించింది. 43వ నిమిషంలో దీపిక సోరెంగ్ గోల్ చేయడంతో భారత్ 2-1తో ముందంజలోకి వెళ్లింది. దీంతో మ్యాచ్ పూర్తిగా భారత జట్టు వైపు మొగ్గుచూపినట్లు కనిపించింది.
అయితే చివరి క్షణాల్లో ఉరుగ్వే మరోసారి పోరాట పటిమను చాటుకుంది. 55వ నిమిషంలో గోల్ సాధించి స్కోరును 2-2తో సమం చేసింది. దీంతో మ్యాచ్ ఫలితం ఏ జట్టు వైపు తిరుగుతుందో అన్న ఉత్కంఠ నెలకొంది.
ఈ క్లిష్ట సమయంలో మరోసారి దీపిక సెహ్రావత్ జట్టుకు రక్షకురాలిగా నిలిచింది. 56వ నిమిషంలో తన వ్యక్తిగత 2వ గోల్ నమోదు చేసి భారత్ను 3-2తో మళ్లీ ఆధిక్యంలోకి తీసుకెళ్లింది. మిగిలిన సమయంలో భారత డిఫెన్స్ కట్టుదిట్టంగా ఆడటంతో ఉరుగ్వేకు మరో అవకాశం ఇవ్వకుండా విజయాన్ని ఖాయం చేసింది.
ఈ విజయానికి ముందు భారత్(India) అమెరికా (United States), జపాన్ (Japan) జట్లపై కూడా వరుస విజయాలు సాధించింది. దీంతో గ్రూప్ దశలో 3 మ్యాచ్ల్లోనూ గెలిచి అజేయంగా నిలిచిన భారత జట్టు టోర్నీలో తన సత్తా చాటింది. ఇప్పుడు ఈ నెల 20న జరిగే సెమీఫైనల్లో చిలీతో భారత్ తలపడనుంది. ఇదే జోరును కొనసాగిస్తే టైటిల్కు మరో అడుగు దూరంలో నిలిచే అవకాశం భారత మహిళల జట్టుకు ఉంది.
