ఆంధ్రప్రదేశ్లో (Andhra Pradesh) ప్రస్తుత కూటమి ప్రభుత్వ (Coalition Government) హయాంలో కొత్తగా నమోదైన కొన్ని ప్రైవేట్ కంపెనీలకు (Private Companies) తక్కువ వ్యవధిలోనే భారీ ఎత్తున భూములు, ఆర్థిక ప్రోత్సాహకాలు కేటాయించడంపై తీవ్ర చర్చ జరుగుతోంది. కంపెనీలు ఏర్పాటు చేసిన కొద్ది వారాలు లేదా నెలల్లోనే వందల ఎకరాల భూములు, వందల కోట్ల రూపాయల సబ్సిడీలు (Subsidies) పొందడం పలు ప్రశ్నలకు దారితీస్తోంది.
ఈ జాబితాలో ఉర్సా క్లస్టర్స్ ప్రైవేట్ లిమిటెడ్(Ursa Clusters Private Limited), ఏవర్నో ప్యానెల్స్ ప్రైవేట్ లిమిటెడ్(Averno Panels Private Limited), సేఫ్ వన్ ఇండియా ఎస్పీ కాంపాక్ట్ ప్రైవేట్ లిమిటెడ్(Safe One India SP Compact Private Limited), నాన్ మాగ్నెటెక్, డివైస్ ఫార్మా టెక్ ప్రైవేట్ లిమిటెడ్(Device Pharma Tech Private Limited), ఎకోబాక్స్ ఇండస్ట్రియల్ (Ecobox Industrial Asset) అసెట్ వంటి సంస్థలు ఉన్నాయి. వీటిలో కొన్ని కంపెనీలు స్వల్ప మూలధనంతోనే నమోదు కాగా, అనంతరం తక్కువ సమయంలోనే భూముల కేటాయింపులు, భారీ పెట్టుబడి ప్రతిపాదనలకు అనుగుణంగా ప్రభుత్వ ప్రోత్సాహకాలు పొందినట్లు అధికారిక ఉత్తర్వులు మరియు అందుబాటులో ఉన్న సమాచారం సూచిస్తున్నాయి.
ఈ వ్యవహారంపై ప్రతిపక్షాలు, ప్రజా సంఘాలు ప్రధానంగా నాలుగు అంశాలపై అనుమానాలు వ్యక్తంచేస్తున్నారు. మొదటిగా, కంపెనీలు ఏర్పడిన వెంటనే అసాధారణ వేగంతో భూముల కేటాయింపులు (Land Allocations) జరగడం. రెండవది, కొన్ని ప్రాంతాల్లో మార్కెట్ విలువతో (Market Value) పోలిస్తే చాలా తక్కువ ధరలకు లేదా దీర్ఘకాలిక లీజుల (Long-term Leases) రూపంలో భూములు ఇవ్వడం. మూడవది, సంబంధిత రంగాల్లో అనుభవం లేని డైరెక్టర్లు (Directors) ఉన్న కంపెనీలకు కూడా భారీ ప్రాజెక్టులు అప్పగించడంపై సందేహాలు వ్యక్తమవడం. నాలుగవది, స్వల్ప మూలధనంతో నమోదైన సంస్థలకు వందల కోట్ల రూపాయల ప్రోత్సాహకాలు ప్రకటించడం.
ఈ నేపథ్యంలో భూముల కేటాయింపుల విధానం, కంపెనీల అర్హతలు, పెట్టుబడుల సామర్థ్యం, ప్రభుత్వ ప్రోత్సాహకాల పారదర్శకత వంటి అంశాలపై సమగ్ర విచారణ జరగాలనే డిమాండ్లు వినిపిస్తున్నాయి. ఈ ప్రక్రియలో అన్ని నిబంధనలు పాటించబడ్డాయా? ప్రజా ఆస్తుల విలువకు తగిన రక్షణ కల్పించబడిందా? అనే ప్రశ్నలకు అధికారిక సమాధానాలు రావాల్సి ఉంది.
