టైటిల్: ఇరుముడి (Irumudi)
నటీనటులు: రవితేజ, ప్రియా భవానీ శంకర్, సాయి కుమార్, స్వసికా, బేబీ నక్షత్ర, రమేష్ ఇందిర తదితరులు
నిర్మాణ సంస్థ: మైత్రీ మూవీ మేకర్స్
నిర్మాతలు: నవీన్ యేర్నేని, వై రవిశంకర్
కథ, స్క్రీన్ప్లే, మాటలు, దర్శకత్వం: శివ నిర్వాణ
సంగీతం: జీవీ ప్రకాశ్ కుమార్
సినిమాటోగ్రఫీ: విష్ణు శర్మ
ఎడిటింగ్: ప్రవీణ్ పూడి
విడుదల తేదీ: ఆగస్టు 21, 2026
వరుస సినిమాలతో ప్రేక్షకుల ముందుకు వస్తున్న రవితేజకు (Ravi Teja) చాలాకాలంగా సరైన విజయం దక్కలేదు. అయితే ‘ఇరుముడి’పై(Irumudi) మాత్రం ప్రకటన నుంచే ఆసక్తి ఏర్పడింది. అయ్యప్పమాల (Ayyappa Mala) నేపథ్యంలో తెరకెక్కిన ఈ సినిమా టీజర్, ట్రైలర్ కూడా అంచనాలను పెంచాయి. మరి భారీ అంచనాల మధ్య విడుదలైన ‘ఇరుముడి’ ఎలా ఉంది? రవితేజకు ఈ సినిమా విజయాన్ని అందించిందా?
కథలోకి వెళ్తే..
ఆంధ్రప్రదేశ్లోని(Andhra Pradesh) అల్లూరి సీతారామరాజు జిల్లా సీలేరు ప్రాంతంలోని ఓ చిన్న గ్రామం నేపథ్యంలో ఈ కథ సాగుతుంది. త్రినాథ్ (Trinath) అరటిపళ్ల వ్యాపారం చేస్తుంటాడు. భార్య కావేరి(Kaveri), కూతురు మణికంఠ అలియాస్ మణెమ్మ (Manemma) అంటే అతనికి ఎంతో ప్రేమ. ప్రతి ఏడాది అయ్యప్పమాల ధరించే 41 రోజులు నియమ నిష్ఠలతో ఉండే త్రినాథ్.. మిగతా సమయంలో మద్యం సేవిస్తూ ఉంటాడు.
గ్రామంలో ఏ ఆడపిల్లకు ఇబ్బంది ఎదురైనా త్రినాథ్ ముందుంటాడు. మరోవైపు హైస్కూల్ చదువు కోసం కూతురిని సీలేరుకు(Sileru) పంపిస్తాడు. అక్కడి పాఠశాలలో విద్యార్థులను ఓ ఉపాధ్యాయురాలు ఇబ్బందులకు గురిచేస్తుంటుంది. ఇదే సమయంలో కొందరు అమ్మాయిలు అనుమానాస్పదంగా మృత్యువాత పడుతుంటారు. ఈ ఘటనలకు సంబంధించిన కీలక నిజాలు మణికంఠకు తెలుస్తాయి.
ఆ నిజాలు ఏంటి? వాటిని తండ్రికి చెప్పిందా? విషయం తెలుసుకున్న త్రినాథ్ ఏం చేశాడు? గురుస్వామి గోపరాజుతో(Goparaju) అతనికి ఉన్న అనుబంధం ఏంటి? తన కూతురికి జరిగిన అన్యాయానికి త్రినాథ్ ఎలా ప్రతీకారం తీర్చుకున్నాడు? అనేది సినిమాలో చూడాల్సిందే.
దర్శకుడి ఆలోచన ఎలా ఉంది?
అయ్యప్పమాల నేపథ్యంలో రవితేజను చూపించబోతున్నారనే వార్తతోనే ‘ఇరుముడి’పై ఆసక్తి మొదలైంది. రవితేజ మాస్ ఇమేజ్కు భిన్నంగా దర్శకుడు శివ నిర్వాణ ఈ కథను కుటుంబం, భక్తి, నేరపరమైన అంశాలతో మేళవించి కమర్షియల్ చిత్రంగా తెరకెక్కించారు.
కుటుంబ భావోద్వేగాలు, యాక్షన్, కామెడీ, భక్తి అంశాలను కథకు అనుగుణంగా మేళవించడం సినిమాకు ప్రధాన బలం. ముఖ్యంగా ఆడపిల్లల విషయంలో తల్లిదండ్రుల బాధ్యత, పిల్లల భద్రత వంటి అంశాలను ప్రస్తావించిన కొన్ని సన్నివేశాలు ఆలోచింపజేస్తాయి.
ఫస్టాఫ్ ఎలా సాగిందంటే..
సినిమా పూర్తిగా భక్తి చిత్రంగా కాకుండా కుటుంబ కథతో కూడిన కమర్షియల్ ఎంటర్టైనర్గా సాగుతుంది. కథలో కొత్తదనం పెద్దగా లేకపోయినా.. అయ్యప్ప పాటలు, భక్తి సన్నివేశాలను కథలో మిళితం చేసిన తీరు ప్రత్యేకమైన వాతావరణాన్ని తీసుకొచ్చింది.
మొదటి భాగంలో రవితేజ ప్రవేశం, భార్య, కూతురితో అనుబంధం, కుటుంబ సన్నివేశాలతో కథ సాగుతుంది. అయితే పాఠశాల నేపథ్యంలోని కొన్ని సన్నివేశాలు పునరావృతం కావడంతో అక్కడక్కడా కథనం నెమ్మదిస్తుంది. విరామ సన్నివేశం మాత్రం రెండో భాగంపై ఆసక్తిని పెంచుతుంది.
సెకండాఫ్లో పెరిగిన వేగం..
రెండో భాగంలో కథనం వేగం పుంజుకుంటుంది. పాత్రల మధ్య సంఘర్షణ, భావోద్వేగాలు, యాక్షన్ ఘట్టాలు ఆకట్టుకుంటాయి. ముఖ్యంగా క్లైమాక్స్ భావోద్వేగభరితంగా ఉండటంతో సినిమాకు బలంగా నిలిచింది.
అయితే కొన్ని సన్నివేశాల్లో దర్శకుడు సినిమాటిక్ స్వేచ్ఛను ఎక్కువగా తీసుకున్నారు. మరికొన్ని చోట్ల తర్కపరమైన ప్రశ్నలు ఎదురవుతాయి. అయినప్పటికీ భక్తి నేపథ్యాన్ని కుటుంబ కథతో ముడిపెట్టిన విధానం మెప్పిస్తుంది.
నటీనటుల పనితీరు..
రవితేజ తనకు అలవాటైన మాస్ పాత్రలకు భిన్నంగా మధ్యతరగతి తండ్రి త్రినాథ్గా సహజంగా నటించాడు. కామెడీ, యాక్షన్, భావోద్వేగ సన్నివేశాల్లో మెప్పించాడు. ముఖ్యంగా కూతురిపై ప్రేమను చూపించే సన్నివేశాల్లో ఆకట్టుకున్నాడు.
ప్రియా భవానీ శంకర్ మధ్యతరగతి గృహిణిగా సహజంగా నటించింది. బేబీ నక్షత్ర సినిమాకు ప్రధాన బలంగా నిలిచింది. కీలక సన్నివేశాల్లో ఆమె నటన ఆకట్టుకుంటుంది. జబర్దస్త్ కొమరం ప్రతికూల ఛాయలున్న పాత్రలో మెప్పించాడు. గురుస్వామిగా సాయి కుమార్ తన అనుభవాన్ని చూపించారు. మిగతా నటీనటులు తమ పాత్రల పరిధి మేరకు న్యాయం చేశారు.
సాంకేతిక విభాగం..
జీవీ ప్రకాశ్ కుమార్ సంగీతం, నేపథ్య సంగీతం సినిమాకు బలంగా నిలిచాయి. ‘ఇరుముడి’, ‘మల్లె పూల’ పాటలు ఆకట్టుకుంటాయి. విష్ణు శర్మ సినిమాటోగ్రఫీ బాగుంది. సీలేరు ప్రాంతం, గ్రామీణ వాతావరణాన్ని అందంగా చూపించారు. ప్రవీణ్ పూడి ఎడిటింగ్ పర్వాలేదనిపిస్తుంది. నిర్మాణ విలువలు ఉన్నతంగా ఉన్నాయి.
చివరగా..
భక్తి నేపథ్యానికి కుటుంబ భావోద్వేగాలు, యాక్షన్, కామెడీని జోడించిన కమర్షియల్ కుటుంబ చిత్రం ‘ఇరుముడి’. రవితేజ నటన, బేబీ నక్షత్ర నటన, భావోద్వేగ సన్నివేశాలు సినిమాకు ప్రధాన బలాలు. మొదటి భాగంలోని నెమ్మదైన కథనం, కొన్ని తర్కానికి అందని సన్నివేశాలు మైనస్లు. అయితే రెండో భాగం, ముఖ్యంగా క్లైమాక్స్ సినిమాను నిలబెట్టాయి.
రేటింగ్: 3/5
