ఆంధ్రప్రదేశ్లో వాతావరణ పరిస్థితులు మరోసారి మారనున్నాయి. ఉత్తర బంగాళాఖాతంలో కొనసాగుతున్న అల్పపీడనం ప్రభావంతో రాష్ట్రవ్యాప్తంగా ఇవాళ, రేపు మేఘావృతమైన వాతావరణం ఏర్పడే అవకాశం ఉందని వాతావరణ శాఖ తెలిపింది. అక్కడక్కడ తేలికపాటి వర్షాలు కురిసే అవకాశాలు ఉన్నాయని పేర్కొంది. కొన్ని ప్రాంతాల్లో పిడుగులతో కూడిన వర్షాలు పడే అవకాశం ఉండటంతో ప్రజలు అప్రమత్తంగా ఉండాలని సూచించింది.
అల్పపీడనం ప్రభావం ప్రధానంగా ఉత్తర కోస్తా ప్రాంతాలపై కనిపించే అవకాశం ఉందని వాతావరణ శాఖ వెల్లడించింది. వర్షాలు కురిసే సమయంలో గంటకు 40 నుంచి 60 కిలోమీటర్ల వేగంతో ఈదురుగాలులు వీచే అవకాశం ఉందని హెచ్చరించింది. ముఖ్యంగా రైతులు పంటలు, వ్యవసాయ పనుల విషయంలో తగిన జాగ్రత్తలు తీసుకోవాలని సూచించింది.
ప్రస్తుతం ఉత్తర బంగాళాఖాతంలో కొనసాగుతున్న అల్పపీడనం రానున్న 2 రోజుల్లో క్రమంగా బలహీనపడే అవకాశం ఉందని వాతావరణ శాఖ అంచనా వేసింది. అయినప్పటికీ దాని ప్రభావంతో కోస్తా ప్రాంతాల్లో వర్షాలు కొనసాగే అవకాశాలు ఉన్నాయని తెలిపింది.
ఇదిలా ఉండగా.. వచ్చే వారంలో బంగాళాఖాతంలో మరో అల్పపీడనం ఏర్పడే అవకాశం ఉందని వాతావరణ శాఖ తెలిపింది. ఈ నెల 10న వాయవ్య బంగాళాఖాతంలో ఆవర్తనం ఏర్పడే అవకాశాలు ఉన్నాయని పేర్కొంది. ఈ ఆవర్తనం ప్రభావంతో మరో అల్పపీడనం ఏర్పడే అవకాశం ఉందని అంచనా వేసింది.
మరోవైపు వర్షాలతో పాటు రాష్ట్రంలోని కొన్ని ప్రాంతాల్లో ఉష్ణోగ్రతలు 2 నుంచి 3 డిగ్రీల వరకు పెరిగే అవకాశం ఉందని ఆంధ్రప్రదేశ్ రాష్ట్ర విపత్తుల నిర్వహణ సంస్థ తెలిపింది. మారుతున్న వాతావరణ పరిస్థితులను దృష్టిలో ఉంచుకుని ప్రజలు అప్రమత్తంగా ఉండాలని సూచించింది.
పిడుగులు, ఈదురుగాలులతో కూడిన వర్షాలు కురిసే సమయంలో ప్రజలు బహిరంగ ప్రదేశాల్లో ఉండకుండా జాగ్రత్తలు తీసుకోవాలని అధికారులు సూచించారు. అత్యవసర పరిస్థితుల్లో అప్రమత్తంగా వ్యవహరించాలని పేర్కొన్నారు.
