భారత క్రికెట్ జట్టు చీఫ్ సెలెక్టర్ అజిత్ అగార్కర్(Ajit Agarkar) భవిష్యత్తుపై ఉత్కంఠ కొనసాగుతోంది. అగార్కర్ ప్రస్తుత కాంట్రాక్ట్(Current Contract) సెప్టెంబర్‌లో ముగియనున్న నేపథ్యంలో.. ఆయనను కొనసాగించాలా? లేక కొత్త చీఫ్ సెలెక్టర్‌ను(New Chief Selector) నియమించాలా? అనే అంశంపై బీసీసీఐ(BCCI) త్వరలో కీలక నిర్ణయం తీసుకునే అవకాశం ఉంది. ఈ క్రమంలో బీసీసీఐ పెద్దలు అగార్కర్‌తో ప్రత్యేకంగా సమావేశం కానున్నట్లు సమాచారం.
2027 వన్డే ప్రపంచకప్‌కు ఇంకా ఏడాది సమయం మాత్రమే ఉండటంతో.. ప్రస్తుత సెలక్షన్ కమిటీతోనే ముందుకు వెళ్లాలా? లేక కొత్త నాయకత్వంలో భవిష్యత్ జట్టును సిద్ధం చేయాలా? అనే అంశంపై చర్చ జరుగుతున్నట్లు తెలుస్తోంది. గతంలో అగార్కర్ కాంట్రాక్ట్‌ను బీసీసీఐ పొడిగించిన విషయం తెలిసిందే.
ఇటీవల అగార్కర్‌కు సంబంధించి పలు వార్తలు వెలువడ్డాయి. ముఖ్యంగా మాజీ కెప్టెన్ రోహిత్ శర్మ(Rohit Sharma) అంతర్జాతీయ క్రికెట్‌కు వీడ్కోలు పలికేలా అగార్కర్ ఒత్తిడి తెచ్చారనే ప్రచారం జరిగింది. 2027 ప్రపంచకప్‌ను దృష్టిలో పెట్టుకుని యువ ఆటగాళ్లకు ఎక్కువ అవకాశాలు కల్పించాలనే ఉద్దేశంతో ఈ నిర్ణయం తీసుకోవాలని సూచించినట్లు కథనాలు వచ్చాయి.
రోహిత్ ఇప్పటికే టెస్టులు, టీ20లకు రిటైర్మెంట్ ప్రకటించగా.. వన్డేల్లో కొనసాగుతున్నాడు. ఇంగ్లండ్‌తో లార్డ్స్‌లో(Lord’s) జరిగిన వన్డే మ్యాచ్‌నే అతడి చివరి మ్యాచ్‌గా భావించినప్పటికీ.. రోహిత్ సెంచరీతో అదరగొట్టి విమర్శలకు బ్యాట్‌తోనే సమాధానం ఇచ్చాడు. అతడి స్థానంలో యశస్వి జైస్వాల్‌ను(Yashasvi Jaiswal) తీసుకురావాలనే ఆలోచన కూడా అప్పట్లో ఉందనే ప్రచారం జరిగింది.
ఈ పరిణామాల నేపథ్యంలో బీసీసీఐ కార్యదర్శి దేవజిత్ సైకియా(Devajit Saikia), అజిత్ అగార్కర్ మధ్య అభిప్రాయ భేదాలు ఉన్నాయనే వార్తలు తెరపైకి వచ్చాయి. అలాగే సెప్టెంబర్ 3న జరిగిన బీసీసీఐ పనితీరు సమీక్ష సమావేశానికి అగార్కర్ హాజరు కాకపోవడం కూడా ఊహాగానాలకు కారణమైంది.
తాజాగా స్పోర్ట్‌స్టార్ కథనం ప్రకారం.. అజిత్ అగార్కర్, బీసీసీఐ కార్యవర్గ సభ్యులు త్వరలో సమావేశమై కాంట్రాక్ట్ పొడిగింపుపై చర్చించనున్నట్లు తెలుస్తోంది. రాబోయే 2 రోజుల్లో జరిగే ఈ చర్చల అనంతరం చీఫ్ సెలెక్టర్‌గా అగార్కర్ కొనసాగింపుపై స్పష్టత వచ్చే అవకాశం ఉంది.
