నైరుతి రుతుపవనాలు (Southwest Monsoon) దేశం నుంచి క్రమంగా నిష్క్రమించేందుకు సిద్ధమవుతున్నాయి. మరో 4 నుంచి 5 రోజుల్లో పశ్చిమ రాజస్థాన్ నుంచి రుతుపవనాల ఉపసంహరణ ప్రక్రియ ప్రారంభమయ్యే అవకాశం ఉందని భారత వాతావరణ శాఖ (India Meteorological Department – IMD) వెల్లడించింది. దేశం నుంచి రుతుపవనాలు పూర్తిగా వెనక్కి వెళ్లిన తర్వాత వర్షాకాలం ముగిసినట్లుగా పరిగణిస్తారు.
ఇటీవల పశ్చిమ మధ్య బంగాళాఖాతంలో(West-Central Bay of Bengal) ఏర్పడిన అల్పపీడనం (Low Pressure Area) ప్రభావంతో ఆంధ్రప్రదేశ్‌లోని (Andhra Pradesh) పలు జిల్లాల్లో విస్తారంగా వర్షాలు(Rains) కురిశాయి. శ్రీకాకుళం నుంచి ప్రకాశం వరకు అనేక ప్రాంతాల్లో వర్షపాతం నమోదైంది. మలికిపురంలో అత్యధికంగా 11 సెంటీమీటర్ల వర్షం కురిసింది.
అయితే రాష్ట్రంలో సాధారణ వర్షపాతంతో పోలిస్తే ఇప్పటికీ లోటు కొనసాగుతోంది. ఈ నెల 19 నాటికి పశ్చిమ రాజస్థాన్ (West Rajasthan) నుంచి నైరుతి రుతుపవనాల ఉపసంహరణ ప్రారంభమయ్యే అవకాశాలు ఉన్నాయని వాతావరణ శాఖ అంచనా వేసింది.
ఇదిలా ఉండగా, సముద్ర మట్టానికి సమీపంలో కొనసాగుతున్న రుతుపవన ద్రోణి, వాయువ్య బంగాళాఖాతంపై ఉన్న ఆవర్తనం ప్రభావంతో ఆంధ్రప్రదేశ్‌లో రానున్న 3 రోజులు వర్షాలు కురిసే అవకాశం ఉంది. పలు ప్రాంతాల్లో ఉరుములు, మెరుపులతో కూడిన మోస్తరు వర్షాలు పడే అవకాశం ఉందని అధికారులు తెలిపారు. అదే సమయంలో గంటకు 30 నుంచి 40 కిలోమీటర్ల వేగంతో బలమైన గాలులు వీచే అవకాశం ఉందని హెచ్చరించారు.
ఈ ఏడాది నైరుతి రుతుపవనాలు ఆశించిన స్థాయిలో ప్రభావం చూపలేకపోయాయి. జూన్ 4న కేరళలోకి (Kerala) ప్రవేశించినప్పటికీ ఆ తర్వాత దేశవ్యాప్తంగా ఆశించిన స్థాయిలో వర్షాలు కురవలేదు. జూలై నాటికి రుతుపవనాలు దేశమంతటా విస్తరించినప్పటికీ అనేక ప్రాంతాల్లో వర్షపాతం తక్కువగానే నమోదైంది.
జూన్ నుంచి సెప్టెంబర్ వరకు కొనసాగే వర్షాకాలంలో తొలి 3 నెలలు తీవ్ర ఎండలు, చెదురుమదురు వర్షాలతోనే గడిచాయి. సాధారణంగా విస్తారమైన వర్షాలు కురిపించే అల్పపీడనాలు, వాయుగుండాలు ఎక్కువగా ఉత్తర ఒడిశా, పశ్చిమ బెంగాల్ వైపు కదలడంతో ఆంధ్రప్రదేశ్‌లో ఆశించిన స్థాయిలో వర్షాలు కురవలేదని వాతావరణ నిపుణులు చెబుతున్నారు.
ప్రస్తుతం అక్కడక్కడా కురుస్తున్న వర్షాలతో నైరుతి రుతుపవనాల సీజన్ ముగింపు దశకు చేరుకుంది. రుతుపవనాల ఉపసంహరణ ప్రక్రియ ప్రారంభం కానుండటంతో రానున్న రోజుల్లో వర్షాల తీవ్రత క్రమంగా తగ్గే అవకాశం ఉంది.
