మహిళల క్రికెట్(Women’s Cricket) అభిమానులకు శుభవార్త. 2027 డబ్ల్యూపీఎల్‌కు (WPL – Women’s Premier League) సంబంధించిన కీలక తేదీలను భారత క్రికెట్ నియంత్రణ మండలి (BCCI) ప్రకటించింది. ఐదో సీజన్ డబ్ల్యూపీఎల్ జనవరి 14 నుంచి ఫిబ్రవరి 7 వరకు జరగనుంది. దీంతో కొత్త ఏడాది ఆరంభంలోనే భారత మైదానాల్లో మహిళా క్రికెట్ సందడి మొదలుకానుంది.
డబ్ల్యూపీఎల్ (WPL) ముగిసిన వెంటనే మరో ప్రతిష్టాత్మక టోర్నీ ప్రారంభం కానుంది. తొలుత శ్రీలంకలో నిర్వహించాల్సిన మహిళల ఛాంపియన్స్ ట్రోఫీని భారత్‌కు(India) మార్చారు. ఈ టోర్నీ ఫిబ్రవరి 14 నుంచి 28 వరకు జరగనుంది. అంటే డబ్ల్యూపీఎల్ ఫైనల్ ముగిసిన వారం రోజులకే ఛాంపియన్స్ ట్రోఫీ పోటీలు మొదలవుతాయి.
మరోవైపు డబ్ల్యూపీఎల్ 2027 వేలానికి కూడా తేదీ ఖరారైంది. కొచ్చిలోని (Kochi) గ్రాండ్ హయత్‌లో(Grand Hyatt) అక్టోబర్ 28న ఆటగాళ్ల వేలం నిర్వహించనున్నారు. అంతకంటే ముందుగా సెప్టెంబర్ 28లోపు తమ జట్లలో కొనసాగించనున్న ఆటగాళ్ల జాబితాను ఫ్రాంచైజీలు ఖరారు చేయాల్సి ఉంటుంది.
రిటెన్షన్ ప్రక్రియ పూర్తైన తర్వాత వేలంలో(Auction) తమకు అవసరమైన ఆటగాళ్లను ఎంపిక చేసుకునే అవకాశం ఫ్రాంచైజీలకు ఉంటుంది. ప్రస్తుత జట్టులోని కీలక ఆటగాళ్లను కొనసాగించడంతో పాటు కొత్త సీజన్‌కు అవసరమైన జట్టు కూర్పును రూపొందించుకునేందుకు వేలం కీలకం కానుంది.
ఇక డబ్ల్యూపీఎల్ 2027 మ్యాచ్‌ల వేదికలపై కూడా కసరత్తు కొనసాగుతోంది. అందుబాటులో ఉన్న నివేదికల ప్రకారం ముంబైలోని బ్రబౌర్న్ స్టేడియం(Brabourne Stadium), వడోదరలోని కొటాంబి స్టేడియం (Kotambi Stadium) వేదికల జాబితాలో ఉన్నట్లు తెలుస్తోంది.
డబ్ల్యూపీఎల్ అనంతరం జరిగే మహిళల ఛాంపియన్స్ ట్రోఫీ మ్యాచ్‌లకు కూడా ఈ రెండు మైదానాలు ఆతిథ్యం ఇవ్వనున్నట్లు సమాచారం. దీంతో 2027 ప్రారంభంలో మహిళల క్రికెట్‌కు సంబంధించిన రెండు కీలక టోర్నీలు వరుసగా జరగనుండటంతో అభిమానులకు క్రికెట్ వినోదం మరింత పెరగనుంది.
