పూరి జగన్నాథ్(Puri Jagannadh), విజయ్ సేతుపతి (Vijay Sethupathi) కాంబినేషన్‌లో రూపొందుతున్న ‘స్లమ్ డాగ్ 33 టెంపుల్ రోడ్’(Slum Dog 33 Temple Road) సినిమాపై ఇప్పటికే ప్రేక్షకుల్లో ఆసక్తి నెలకొంది. తాజాగా ఈ చిత్రంలో సీనియర్ నటి జరీనా వహాబ్ కీలక పాత్రలో నటిస్తున్నట్లు మేకర్స్ వెల్లడించారు. ‘జుబైదాగా జరీనా వహాబ్’(Zarina Wahab as Zubaida) అంటూ విడుదల చేసిన గ్లింప్స్ ఇప్పుడు సినిమాపై మరింత ఆసక్తిని పెంచుతోంది.
1 నిమిషం 17 సెకండ్ల నిడివితో విడుదలైన ఈ గ్లింప్స్(Glimpse) ఆద్యంతం భావోద్వేగభరితంగా సాగింది. నాంపల్లి స్టేషన్‌కు వెళ్లి రైలు కింద పడి చనిపోవాలని అనుకున్నానని, కానీ ఆ ధైర్యం కూడా తనకు సరిపోలేదని జరీనా వహాబ్ చెప్పే డైలాగ్‌తో గ్లింప్స్ ప్రారంభమవుతుంది.
ఆ తర్వాత ఆకలి(Hunger), పేదరికం(Poverty), నిస్సహాయతతో(Helplessness) జుబైదా ఎదుర్కొంటున్న పరిస్థితులను చూపించారు. ఆకలి ముందు సిగ్గు, లజ్జ, మానం, మర్యాద అన్నీ ఓడిపోతాయని చెప్పే డైలాగ్ పాత్రలోని బాధను మరింత బలంగా ఆవిష్కరిస్తుంది. తెలియకుండానే తన చేతులు అడుక్కోవడం మొదలుపెట్టాయని చెప్పే సన్నివేశం కూడా హృదయాన్ని తాకేలా ఉంది.
ఇక “అమ్మ ఉన్నది అన్నం పెట్టడానికి.. అడుక్కోవడానికి కాదు” అనే డైలాగ్ గ్లింప్స్‌కు ప్రధాన ఆకర్షణగా నిలిచింది. జుబైదా పాత్రలో జరీనా వహాబ్ చూపించిన హావభావాలు, భావోద్వేగ నటన ప్రేక్షకులను ఆకట్టుకునేలా ఉన్నాయి.
విజయ్ సేతుపతికి జోడీగా సంయుక్త మీనన్ (Samyuktha Menon) నటిస్తుండగా, టబు కీలక పాత్రలో కనిపించనున్నారు. హర్షవర్ధన్ రామేశ్వర్ (Harshavardhan Rameshwar) ఈ చిత్రానికి సంగీతం అందిస్తున్నారు. పూరి జగన్నాథ్ దర్శకత్వ శైలి, విజయ్ సేతుపతి, సంయుక్త మీనన్, టబు, జరీనా వహాబ్ వంటి నటీనటుల కలయికతో ‘స్లమ్ డాగ్ 33 టెంపుల్ రోడ్’పై అంచనాలు పెరుగుతున్నాయి.
తాజాగా విడుదలైన జరీనా వహాబ్ గ్లింప్స్ సినిమాకు సంబంధించిన కథ, పాత్రలు, భావోద్వేగాలపై మరింత ఆసక్తిని రేకెత్తిస్తోంది. ఈ చిత్రం త్వరలోనే థియేటర్లలోకి రానుంది.
