వెస్టిండీస్‌తో (West Indies) జరిగిన 3వ వన్డేలో ఓటమి చెందిన టీమిండియాకు (Team India) మ్యాచ్ ముగిసిన తర్వాత మరో షాక్ తగిలింది. స్లో ఓవర్ రేట్ (Slow Over Rate) నిబంధనలను ఉల్లంఘించినందుకు భారత్, వెస్టిండీస్ జట్లపై ఐసీసీ (ICC) జరిమానా(Fine) విధించింది.
సెప్టెంబర్ 3న ముల్లాన్‌పూర్‌లో జరిగిన మ్యాచ్‌లో తొలుత బ్యాటింగ్ చేసిన భారత్ 352 పరుగుల భారీ లక్ష్యాన్ని నిర్దేశించింది. అయితే విండీస్ కెప్టెన్ షాయ్ హోప్ (Shai Hope) 162 పరుగులతో అజేయంగా నిలవడంతో ఆ జట్టు 10 బంతులు మిగిలి ఉండగానే 5 వికెట్ల తేడాతో విజయం సాధించింది. తొలి 2 వన్డేల్లో గెలిచిన భారత్ సిరీస్‌ను 2-1తో కైవసం చేసుకున్నప్పటికీ, చివరి మ్యాచ్‌లో ఓటమితో క్లీన్ స్వీప్ అవకాశాన్ని కోల్పోయింది.
మ్యాచ్‌లో నిర్ణీత సమయంలో ఓవర్లు పూర్తి చేయకపోవడంతో భారత్ 4 ఓవర్లు, వెస్టిండీస్ 2 ఓవర్లు వెనుకబడ్డాయి. దీంతో భారత ఆటగాళ్ల మ్యాచ్ ఫీజులో 20 శాతం, వెస్టిండీస్ ఆటగాళ్ల మ్యాచ్ ఫీజులో 10 శాతం కోత విధించారు.
ఐసీసీ ప్రవర్తనా నియమావళిలోని ఆర్టికల్ 2.22 ప్రకారం ఆలస్యంగా వేసిన ప్రతి ఓవర్‌కు మ్యాచ్ ఫీజులో 5 శాతం జరిమానా విధిస్తారు. ఈ నిబంధన ప్రకారమే ఇరు జట్లపై పెనాల్టీ పడింది.
స్లో ఓవర్ రేట్ ఉల్లంఘనను ఇరు జట్ల కెప్టెన్లు అంగీకరించడంతో ప్రత్యేక విచారణ అవసరం లేకుండానే కేసు ముగిసింది. దీంతో మూడో వన్డేలో వెస్టిండీస్ చేతిలో ఓటమితో పాటు భారత్ జరిమానా కూడా ఎదుర్కోగా, విజయం సాధించిన విండీస్‌కు సైతం ఐసీసీ పెనాల్టీ తప్పలేదు.
