ఆలూరు వైఎస్సార్‌సీపీ (YSRCP) ఎమ్మెల్యే బుసినె విరూపాక్షికి (Busine Virupakshi) ఆంధ్రప్రదేశ్ హైకోర్టులో (Andhra Pradesh High Court) ఊరట లభించింది. ఆయనపై నమోదైన ఎస్సీ, ఎస్టీ అట్రాసిటీ కేసులో హైకోర్టు బెయిల్ మంజూరు చేసింది. గత 68 రోజులుగా జిల్లా జైలులో రిమాండ్‌లో ఉన్న విరూపాక్షి విడుదలకు మార్గం సుగమమైంది. ఇప్పటికే కొన్ని కేసుల్లో బెయిల్ (Bail) పొందిన ఆయనకు, తాజాగా అట్రాసిటీ కేసులోనూ (SC/ST Atrocities Case) ఊరట లభించడంతో వైఎస్సార్‌సీపీ శ్రేణుల్లో హర్షం వ్యక్తమవుతోంది.
ఎమ్మెల్యే విరూపాక్షి బెయిల్(Bail) కోసం ఆయన తరఫు న్యాయవాదులు హైకోర్టును ఆశ్రయించారు. ఈ కేసుకు సంబంధించి మంగళవారం వాదోపవాదాలు ముగిశాయి. ఎమ్మెల్యే తరఫున ప్రముఖ న్యాయవాది పొన్నవోలు సుధాకర్ రెడ్డితో (Ponnavolu Sudhakar Reddy) పాటు వైఎస్సార్‌సీపీ లీగల్ సెల్ రాష్ట్ర కార్యదర్శి జీవన్‌సింగ్(Jeevan Singh), లక్ష్మీకాంత్ (Lakshmikanth) వాదనలు వినిపించారు. ఇరువర్గాల వాదనలు, కేసులోని అంశాలను పరిశీలించిన న్యాయస్థానం తీర్పును గురువారానికి రిజర్వ్ చేసింది. అనంతరం ఎస్సీ, ఎస్టీ అట్రాసిటీ కేసులో బెయిల్ మంజూరు చేస్తూ ఉత్తర్వులు జారీ చేసింది.
అసలు కేసు నేపథ్యం ఏమిటి?
చిప్పగిరి మండలం సంగాల గ్రామంలో వైఎస్సార్‌సీపీ నేత గిరి(Giri) ఇంటిపై టీడీపీ నాయకుడు నాగరాజు(Nagaraju), ఆయన అనుచరులు దాడికి పాల్పడినట్లు ఆరోపణలు ఉన్నాయి. ఈ ఘటనలో బాధిత కుటుంబాన్ని పరామర్శించేందుకు ఎమ్మెల్యే విరూపాక్షి అక్కడికి వెళ్లారు. ఆ సమయంలో టీడీపీకి చెందిన వ్యక్తులు ఎమ్మెల్యేపై రాళ్లు రువ్వారని, ఈ ఘటనలో ఆయన సోదరుడు శ్రీరాముడు (Sriramudu) గాయపడ్డారని వైఎస్సార్‌సీపీ వర్గాలు ఆరోపిస్తున్నాయి. ఈ ఘటనపై టీడీపీ నాయకులపై ఫిర్యాదు చేసినప్పటికీ పోలీసులు స్పందించలేదని, అనంతరం ఎమ్మెల్యేనే గొడవకు కారణంగా చూపుతూ కేసులు నమోదు చేశారని వైఎస్సార్‌సీపీ నేతలు విమర్శిస్తున్నారు.
అర్ధరాత్రి అరెస్టుపై వైఎస్సార్‌సీపీ ఆరోపణలు
ఎమ్మెల్యే విరూపాక్షి ఇంటిపై అర్ధరాత్రి పోలీసు బలగాలు దాడి చేసినట్లు వ్యవహరించాయని, కుటుంబ సభ్యులను భయభ్రాంతులకు గురిచేశాయని వైఎస్సార్‌సీపీ వర్గాలు ఆరోపించాయి. తలుపులు పగులగొట్టి విరూపాక్షితో పాటు ఆయన కుమారుడు చంద్రశేఖర్‌ను అరెస్టు చేసి చిప్పగిరి పోలీస్‌స్టేషన్‌కు తరలించినట్లు పేర్కొన్నాయి. అనంతరం ఎమ్మెల్యేను కోర్టులో హాజరుపరచగా రిమాండ్ విధించారు. తాజాగా హైకోర్టు బెయిల్ మంజూరు చేయడంతో 68 రోజుల రిమాండ్ అనంతరం ఎమ్మెల్యే విరూపాక్షి జైలు నుంచి విడుదలయ్యేందుకు మార్గం సుగమమైంది.
