ఆంధ్రప్రదేశ్‌లో (Andhra Pradesh) స్థానిక సంస్థల ఎన్నికలకు (Local Body Elections) రాజకీయ పార్టీలు సన్నద్ధమవుతున్న వేళ, వైఎస్సార్ కాంగ్రెస్ పార్టీ (YSR Congress Party) అధినేత వైఎస్ జగన్ మోహన్ రెడ్డి (YS Jagan Mohan Reddy) పార్టీ ప్రాంతీయ సమన్వయకర్తలతో సుదీర్ఘంగా సమావేశమయ్యారు. ఉదయం ప్రారంభమైన ఈ భేటీ సుమారు ఆరు గంటలకు పైగా కొనసాగినట్లు పార్టీ వర్గాలు వెల్లడించాయి. జిల్లాల వారీగా సమన్వయకర్తలతో ముఖాముఖి చర్చలు నిర్వహించిన జగన్, స్థానిక ఎన్నికలకు పార్టీ సన్నద్ధత, బలమైన అభ్యర్థుల ఎంపిక, ఎన్నికల ఎజెండా, ప్రచార వ్యూహాలపై ప్రధానంగా దృష్టి సారించినట్లు సమాచారం.
మేయర్లు(Mayors), మున్సిపల్ చైర్మన్ల (Municipal Chairpersons) ఎంపికతో పాటు ఎన్నికల బరిలో నిలిపే అభ్యర్థుల జాబితాను త్వరలోనే ఖరారు చేసే అవకాశం ఉందని పార్టీ వర్గాలు భావిస్తున్నాయి. ఉమ్మడి సమావేశం అనంతరం కూడా ఒక్కొక్కరితో విడివిడిగా చర్చలు జరపడం ద్వారా జిల్లాల వారీగా పార్టీ పరిస్థితులు, ఎన్నికల సన్నద్ధతపై జగన్ వివరాలు తెలుసుకున్నట్లు తెలుస్తోంది.
ఈసారి స్థానిక ఎన్నికలకు సంబంధించిన వ్యూహరచన, ప్రచార పర్యవేక్షణలో జగన్ నేరుగా పర్యావేక్షణ చేపట్టనున్నారనే సంకేతాలు ఈ సమావేశం ద్వారా కనిపిస్తున్నాయని పార్టీ నేతలు పేర్కొంటున్నారు. అభ్యర్థుల ఎంపిక నుంచి ప్రచార ప్రణాళిక వరకు పార్టీ అనుసరించబోయే విధానంపై తదుపరి నిర్ణయాలపై రాజకీయ వర్గాల్లో ఆసక్తి నెలకొంది.
