రైతు డిస్కమ్‌తో ఉచిత విద్యుత్‌కు ముప్పు.. ప్రభుత్వంపై హరీశ్‌రావు విమర్శలు!

తెలంగాణలో (Telangana) కొత్తగా ఏర్పాటు చేసిన రైతు విద్యుత్ పంపిణీ సంస్థపై (Farmers’ Power Distribution Company) వివాదం నెలకొంది. తెలంగాణ రైతు పవర్ డిస్ట్రిబ్యూషన్ కంపెనీ లిమిటెడ్‌ (టీజీఆర్‌పీడీసీఎల్‌) (Telangana Rythu Power Distribution Company Limited – TGRPDCL) ఏర్పాటుకు సంబంధించి ప్రభుత్వం జారీ చేసిన జీవో 17పై బీఆర్ఎస్ అభ్యంతరం వ్యక్తం చేసింది. రైతు డిస్కమ్ పేరుతో ఉచిత విద్యుత్‌కు ముప్పు తెచ్చే అవకాశం ఉందని మాజీ మంత్రి హరీశ్‌రావు (Harish Rao) ఆరోపించారు.

ఉద్యోగులు, ఆస్తులు, అప్పులు, విద్యుత్ పంపిణీ నెట్‌వర్క్‌, కొనుగోలు ఒప్పందాలు, ఇతర బాధ్యతలను కొత్త సంస్థకు బదిలీ చేస్తూ ప్రభుత్వం ఉత్తర్వులు జారీ చేసింది. అయితే రైతులు, ఉద్యోగ సంఘాలు, విద్యుత్ రంగ నిపుణుల అభ్యంతరాలను పట్టించుకోకుండా ముందుకు వెళ్లడం సరికాదని హరీశ్‌రావు విమర్శించారు.

కొత్త సంస్థ ఏర్పాటుతో రైతులకు కలిగే ప్రయోజనాలపై ప్రభుత్వం స్పష్టత ఇవ్వాలని హరీశ్‌రావు డిమాండ్ చేశారు. ఇప్పటికే ట్రాన్స్‌ఫార్మర్ల సమస్యలతో రైతులు ఇబ్బందులు పడుతున్నారని, ఉచిత విద్యుత్ కొనసాగింపుతో పాటు నాణ్యమైన సరఫరాపై ప్రభుత్వం హామీ ఇవ్వాలని కోరారు.

ప్రభుత్వ ఉత్తర్వుల ప్రకారం, కొత్త డిస్కమ్ పరిధిలోకి 30,62,853 విద్యుత్ కనెక్షన్లు, 512 లిఫ్ట్ ఇరిగేషన్ పథకాలు బదిలీ చేసినట్లు హరీశ్‌రావు తెలిపారు. 6,15,651 వ్యవసాయ ట్రాన్స్‌ఫార్మర్లు, 2.51 లక్షల సర్క్యూట్ కిలోమీటర్ల వ్యవసాయ ఎల్‌టీ లైన్లను కేవలం 2,000 మంది సిబ్బందితో ఎలా నిర్వహిస్తారని ప్రశ్నించారు.

కొత్త డిస్కమ్‌కు (New DISCOM) థర్మల్ విద్యుత్‌లో(Thermal Power) 25 శాతం మాత్రమే కేటాయించారని, సౌర విద్యుత్‌పై ఆధారపడటం వల్ల రాత్రివేళ సరఫరాకు ఇబ్బందులు రావచ్చని హరీశ్‌రావు ఆందోళన వ్యక్తం చేశారు. 2,325 మెగావాట్ల జలవిద్యుత్ కేటాయింపుపైనా ప్రశ్నలు లేవనెత్తారు. రైతులకు 24 గంటల ఉచిత విద్యుత్ సరఫరా కొనసాగుతుందని ప్రభుత్వం లిఖితపూర్వక హామీ ఇవ్వాలని డిమాండ్ చేశారు.

కొత్త సంస్థకు బదిలీ చేసే అప్పులు, బకాయిలు, ఆస్తుల వివరాలను ప్రభుత్వం వెల్లడించాలని హరీశ్‌రావు కోరారు. అదనపు పరిపాలనా ఖర్చులను ఎవరు భరిస్తారని ప్రశ్నించారు. భవిష్యత్తులో నష్టాల పేరుతో రైతులపై ఆంక్షలు విధించే పరిస్థితి రాకుండా స్పష్టత ఇవ్వాలని అన్నారు.

రైతుల అభ్యంతరాలు, విద్యుత్ రంగ నిపుణుల సందేహాలకు ప్రభుత్వం సమాధానం చెప్పాలని హరీశ్‌రావు డిమాండ్ చేశారు. కొత్త సంస్థల ఏర్పాటు కంటే రైతులకు నాణ్యమైన విద్యుత్ అందించడం ముఖ్యమని పేర్కొంటూ, అన్ని సందేహాలను నివృత్తి చేయాలని లేదా జీవో 17ను ఉపసంహరించుకోవాలని కోరారు.