బీఆర్ఎస్(BRS) అధినేత కేసీఆర్ (KCR) కీలక రాజకీయ నిర్ణయాలతో మళ్లీ చర్చలోకి వచ్చారు. ఎర్రవెల్లి నివాసంలో పార్టీ అగ్రనేతలు కేటీఆర్(KTR), హరీష్ రావులతో (Harish Rao) సమావేశమైన ఆయన, దేశ రాజకీయాల్లో రాబోయే మార్పులపై విస్తృతంగా చర్చించారు. ముఖ్యంగా మహిళా రిజర్వేషన్ (Women’s Reservation), నియోజకవర్గాల పునర్విభజన (Delimitation) అంశాలపై స్పష్టమైన వైఖరి వెల్లడించారు.
మహిళా రిజర్వేషన్కు పూర్తి మద్దతు
చట్టసభల్లో మహిళలకు మూడో వంతు రిజర్వేషన్ కల్పించే బిల్లుకు తమ పార్టీ సంపూర్ణ మద్దతు ఇస్తుందని కేసీఆర్ ప్రకటించారు. గతంలోనే అసెంబ్లీలో మహిళా రిజర్వేషన్కు అనుకూలంగా తీర్మానం చేశామని గుర్తుచేశారు. పార్లమెంట్లో కూడా తమ ఎంపీలు(MPs) ఈ బిల్లుకు మద్దతు ఇస్తారని స్పష్టం చేశారు.
డీలిమిటేషన్పై దక్షిణాది ఆందోళన
నియోజకవర్గాల పునర్విభజన అంశంపై కేసీఆర్(KCR) తీవ్ర అభ్యంతరం వ్యక్తం చేశారు. డీలిమిటేషన్ (Delimitation) వల్ల దక్షిణాది రాష్ట్రాలకు (Southern States) నష్టం కలిగితే ఎట్టి పరిస్థితుల్లోనూ అంగీకరించబోమని తేల్చి చెప్పారు. ప్రస్తుతం ఉన్న ప్రాతినిధ్యం తగ్గకుండా చూడాలని కేంద్రాన్ని డిమాండ్ చేశారు. జనాభా నియంత్రణ పాటించిన రాష్ట్రాలకు అన్యాయం జరగకూడదని పేర్కొన్నారు.
బిల్లులోని ప్రతీ అంశాన్ని సమగ్రంగా పరిశీలించిన తర్వాతే తుది నిర్ణయం తీసుకుంటామని, అప్పటివరకు ఆతురపడవద్దని పార్టీ నేతలకు సూచించారు.
పార్టీ కార్యక్రమాలపై దిశానిర్దేశం
రాజకీయ అంశాలతో పాటు పార్టీ కార్యక్రమాలపై కూడా కేసీఆర్ దృష్టి సారించారు. ఈ నెలలో నిర్వహించనున్న భారీ బహిరంగ సభ, అలాగే పార్టీ ఆవిర్భావ వేడుకలను ఘనంగా నిర్వహించేలా ఏర్పాట్లు చేయాలని నేతలకు సూచించారు.
