పాత్రికేయ రంగంలో అత్యంత ప్రతిష్టాత్మకంగా భావించే పులిట్జర్ పురస్కారాలు (Pulitzer Prize)ఈసారి ఇద్దరు భారతీయ జర్నలిస్టులను (Indian Journalists) వరించాయి. డిజిటల్ నిఘా వ్యవస్థలు, పెరుగుతున్న సైబర్ మోసాలపై లోతైన విశ్లేషణాత్మక కథనాలు అందించినందుకు ప్రముఖ జర్నలిస్టులు ఆనంద్ ఆర్కే, సుపర్ణా శర్మ ఈ గౌరవాన్ని దక్కించుకున్నారు. ఇలస్ట్రేటెడ్ రిపోర్టింగ్ అండ్ కామెంటరీ విభాగంలో (Illustrated Reporting and Commentary) వీరు ఎంపిక కావడం విశేషం. బ్లూమ్బెర్గ్ మీడియా సంస్థ (Bloomberg Media Organization) కోసం చేసిన ప్రత్యేక రిపోర్టింగ్ ప్రాజెక్ట్కు గాను మరో జర్నలిస్ట్ నటాలీ ఒబికో పియర్సన్తో కలిసి ఈ అవార్డును పంచుకోనున్నారు.
పులిట్జర్ పురస్కారం ప్రపంచవ్యాప్తంగా అత్యున్నత గౌరవాల్లో ఒకటిగా గుర్తింపు పొందింది. అమెరికాలోని కొలంబియా యూనివర్సిటీ జర్నలిజం విభాగం పర్యవేక్షణలో ఈ అవార్డులు అందజేయబడతాయి. జర్నలిజం, సాహిత్యం, సంగీతం వంటి రంగాల్లో అసాధారణ ప్రతిభ చూపిన వ్యక్తులను గౌరవించే ప్రతిష్టాత్మక వేదికగా ఇది నిలిచింది.
ఆనంద్ ఆర్కే (Anand RK) ముంబైకి చెందిన ప్రతిభావంతుడైన ఇలస్ట్రేటర్ మరియు విజువల్ ఆర్టిస్ట్. సర్ జేజే స్కూల్ ఆఫ్ ఆర్ట్ నుంచి పట్టభద్రుడైన ఆయనకు అంతర్జాతీయ స్థాయిలో అనేక ప్రాజెక్టులపై పనిచేసిన అనుభవం ఉంది. బ్లూ ఇన్ గ్రీన్ అనే గ్రాఫిక్ నవల కోసం చేసిన పనికి ఆయనకు ఐస్నర్ అవార్డు కూడా లభించింది. డార్క్ హార్స్ కామిక్స్, డీసీ కామిక్స్ వంటి ప్రముఖ సంస్థలతో పాటు పలు ప్రచురణ సంస్థలకు కవర్ ఆర్ట్ రూపొందించి తన ప్రతిభను చాటుకున్నారు.
సుపర్ణా శర్మ(Suparna Sharma) దాదాపు మూడు దశాబ్దాల అనుభవం కలిగిన ఇన్వెస్టిగేటివ్ జర్నలిస్ట్. నేరాలు, అవినీతి, వివాదాలు, విపత్తులు వంటి అంశాలపై లోతైన కథనాలు రాయడంలో ఆమెకు ప్రత్యేక గుర్తింపు ఉంది. ఢిల్లీలోని ఒక వృద్ధాశ్రమంలో జరిగిన అగ్నిప్రమాదంపై ఆమె చేసిన పరిశోధనాత్మక కథనం దేశవ్యాప్తంగా చర్చనీయాంశమైంది. వృద్ధుల సంరక్షణలో ఉన్న లోపాలను, వాస్తవాలను దాచిపెట్టే ప్రయత్నాలను ఆమె స్పష్టంగా బయటపెట్టారు.
ఈ ఇద్దరు జర్నలిస్టులకు పులిట్జర్ పురస్కారం లభించడం భారతీయ పాత్రికేయ రంగానికి గర్వకారణంగా మారింది. అంతర్జాతీయ వేదికపై భారత ప్రతిభ మరోసారి వెలుగొందిన సందర్భమిదిగా పలువురు అభిప్రాయపడుతున్నారు.
