కాంగ్రెస్ (Congress) మాజీ అధ్యక్షురాలు, రాజ్యసభ సభ్యురాలు సోనియా గాంధీ(Sonia Gandhi) అనారోగ్య కారణాలతో గురుగ్రామ్లోని (Gurugram) మేదాంత ఆసుపత్రిలో (Medanta Hospital) చేరినట్లు సమాచారం. 79 ఏళ్ల సోనియా గాంధీకి స్వల్ప శస్త్రచికిత్స నిర్వహించేందుకు వైద్యులు (Doctors) ఆసుపత్రిలో చేర్చినట్లు జాతీయ మీడియా కథనాలు వెల్లడిస్తున్నాయి. ఈ ఏడాది జనవరి నెల నుంచి ఆమె ఆసుపత్రిలో చేరడం ఇది మూడోసారి కావడం రాజకీయ వర్గాల్లో చర్చనీయాంశంగా మారింది.
వైద్యుల పర్యవేక్షణలో ప్రస్తుతం ఆమెకు పలు రకాల వైద్య పరీక్షలు నిర్వహిస్తున్నట్లు తెలుస్తోంది. నేటి ఉదయం ఆసుపత్రిలో చేరిన సోనియా గాంధీ ఆరోగ్య పరిస్థితి ప్రస్తుతం నిలకడగానే ఉందని వైద్య వర్గాలు చెబుతున్నాయి. అయితే ఆమెకు నిర్వహిస్తున్న చికిత్స, శస్త్రచికిత్సకు సంబంధించిన పూర్తి వివరాలపై ఇంకా అధికారిక ప్రకటన వెలువడాల్సి ఉంది.
గత కొంతకాలంగా వయస్సు సంబంధిత ఆరోగ్య సమస్యలతో సోనియా గాంధీ ఇబ్బంది పడుతున్న విషయం తెలిసిందే. అయినప్పటికీ రాజకీయ పరిణామాలు, పార్టీ కార్యక్రమాలపై ఆమె నిరంతరం పర్యవేక్షణ కొనసాగిస్తున్నారని కాంగ్రెస్ వర్గాలు చెబుతున్నాయి.
