ఐపీఎల్ 2026(IPL 2026) టోర్నీ ముగింపు దశకు చేరుకున్న వేళ గుజరాత్ టైటాన్స్(GT) అద్భుత ప్రదర్శనతో ఫైనల్కు(Final) అర్హత సాధించింది. క్వాలిఫయర్-2లో రాజస్థాన్ రాయల్స్(RR) నిర్దేశించిన 215 పరుగుల భారీ లక్ష్యాన్ని కేవలం 18.4 ఓవర్లలోనే ఛేదించి ఘనవిజయం సాధించింది. ఈ విజయంతో మే 31న అహ్మదాబాద్ (Ahmedabad) వేదికగా జరిగే ఫైనల్లో రాయల్ ఛాలెంజర్స్ బెంగళూరుతో(RCB) గుజరాత్ టైటాన్స్(GT) తలపడనుంది.
టాస్ గెలిచిన రాజస్థాన్ రాయల్స్ ముందుగా బ్యాటింగ్ ఎంచుకుని 20 ఓవర్లలో 6 వికెట్ల నష్టానికి 214 పరుగులు చేసింది. జట్టు ఇన్నింగ్స్కు 15 ఏళ్ల యువ సంచలనం వైభవ్ సూర్యవంశీ (Vaibhav Suryavanshi) ప్రధాన బలంగా నిలిచాడు. కేవలం 4 పరుగుల తేడాతో సెంచరీ చేజార్చుకున్న అతడు 96 పరుగులతో అద్భుత ఇన్నింగ్స్ ఆడాడు. మరోవైపు డొనోవన్ ఫెరీరా చివర్లో మెరుపులు మెరిపిస్తూ కేవలం 11 బంతుల్లోనే 38 పరుగులు సాధించి జట్టు స్కోరును 214 పరుగులకు చేర్చాడు.
215 పరుగుల భారీ లక్ష్యంతో బరిలోకి దిగిన గుజరాత్ టైటాన్స్కు ఓపెనర్లు శుభ్మన్ గిల్(Shubman Gill), సాయి సుదర్శన్ (Sai Sudharsan) కలల ఆరంభాన్ని అందించారు. తొలి ఓవర్లోనే 19 పరుగులు రాబట్టి రాజస్థాన్ బౌలర్లపై ఎదురుదాడి ప్రారంభించారు. ఇద్దరూ కలిసి తొలి వికెట్కు భారీ భాగస్వామ్యాన్ని నెలకొల్పి మ్యాచ్ను పూర్తిగా గుజరాత్ వైపు తిప్పేశారు.
కెప్టెన్ శుభ్మన్ గిల్ 53 బంతుల్లో 15 ఫోర్లు, 3 సిక్సర్లతో 104 పరుగులు చేసి అద్భుత సెంచరీ నమోదు చేశాడు. మరోవైపు సాయి సుదర్శన్ 32 బంతుల్లో 58 పరుగులు చేసి జట్టుకు బలమైన పునాది వేశాడు. ఈ సీజన్లో ఇద్దరూ 700కు పైగా పరుగులు సాధించి ప్రత్యేక రికార్డు నెలకొల్పారు.
అయితే సాయి సుదర్శన్ దురదృష్టవశాత్తూ హిట్ వికెట్గా వెనుదిరిగాడు. వరుసగా 2 ఇన్నింగ్స్ల్లో హిట్ వికెట్ కావడం విశేషంగా మారింది. అనంతరం గిల్ కూడా ఎల్బీడబ్ల్యూగా పెవిలియన్ చేరినా అప్పటికే మ్యాచ్ గుజరాత్ ఆధీనంలోకి వెళ్లిపోయింది.
వాషింగ్టన్ సుందర్ (Washington Sundar) 16 పరుగులు చేసి అవుటైన తర్వాత రాహుల్ తెవాటియా (Rahul Tewatia) బాధ్యత తీసుకున్నాడు. 11 బంతుల్లో 13 పరుగులతో నాటౌట్గా నిలిచిన అతడు చివరి దశలో వరుస బౌండరీలు, ఒక భారీ సిక్సర్తో మ్యాచ్ను ముగించాడు. జోస్ బట్లర్ 9 పరుగులతో అతడికి అండగా నిలిచాడు.
ఈ విజయంతో గుజరాత్ టైటాన్స్ ఐపీఎల్ చరిత్రలో తమ అత్యధిక విజయవంతమైన రన్ ఛేజ్ను నమోదు చేసింది. అంతేకాకుండా మూడోసారి ఐపీఎల్ ఫైనల్కు అర్హత సాధించి మరోసారి టైటిల్ వేటకు సిద్ధమైంది. ఇక ఫైనల్లో బెంగళూరుతో జరిగే పోరు అభిమానుల్లో భారీ ఆసక్తిని రేకెత్తిస్తోంది. క్వాలిఫయర్-1లో ఎదురైన ఓటమికి ప్రతీకారం తీర్చుకోవాలనే లక్ష్యంతో గుజరాత్ బరిలోకి దిగనుంది.
