హైదరాబాద్లోని (Hyderabad) నాంపల్లి(Nampally) ఎగ్జిబిషన్ గ్రౌండ్లో (Exhibition Ground) చేప ప్రసాదం (Fish Prasadam) పంపిణీ కార్యక్రమం భారీగా కొనసాగుతోంది. మృగశిర కార్తె (Mrigasira Karte) సందర్భంగా బత్తిని కుటుంబం (Bathini Family) ఆధ్వర్యంలో ప్రతి ఏడాది నిర్వహించే ఈ ప్రత్యేక కార్యక్రమం సోమవారం రాత్రి 9 గంటలకు ప్రారంభమైంది. రాష్ట్ర ప్రభుత్వం వివిధ శాఖల సమన్వయంతో విస్తృత ఏర్పాట్లు చేయగా వేలాది మంది ప్రజలు ప్రసాదం కోసం క్యూ కట్టారు.
చేప ప్రసాదం పంపిణీ కోసం ఫిషరీస్ శాఖ (Fisheries Department) మొత్తం 3 లక్షల చేప పిల్లలను సిద్ధం చేసింది. ఇందులో 1.40 లక్షల కొరమీను (Korameenu Fish) చేప పిల్లలు ఉన్నట్లు అధికారులు వెల్లడించారు. అవసరాన్ని బట్టి మరిన్ని చేప పిల్లలను అందుబాటులోకి తీసుకురావడానికి ప్రత్యేక ప్రణాళికలు అమలు చేస్తున్నారు. రాత్రి ప్రారంభమైన కార్యక్రమంలో ఇప్పటివరకు 50 వేల మందికి పైగా చేప ప్రసాదాన్ని స్వీకరించారు.
ఆంధ్రప్రదేశ్(Andhra Pradesh), తెలంగాణతో (Telangana) పాటు మహారాష్ట్ర, కర్ణాటక, ఛత్తీస్గఢ్, ఒడిశా, ఉత్తరప్రదేశ్, బీహార్, ఢిల్లీ రాష్ట్రాల నుంచి కూడా పెద్ద సంఖ్యలో ప్రజలు హైదరాబాద్కు చేరుకున్నారు. రెండు రోజుల ముందుగానే రోగులు నగరానికి చేరుకుని ప్రసాదం కోసం ఎదురుచూశారు. ఈసారి సుమారు 3 లక్షల మందికి పైగా చేప ప్రసాదం తీసుకునే అవకాశం ఉందని అధికారులు అంచనా వేస్తున్నారు.
ఆస్తమా(Asthma), శ్వాసకోశ సంబంధిత వ్యాధుల (Respiratory Diseases) నివారణకు ఉపయోగపడుతుందనే నమ్మకంతో ప్రజలు ఈ చేప ప్రసాదాన్ని స్వీకరిస్తుంటారు. చిన్న సజీవ చేప నోటిలో ప్రత్యేక ఆయుర్వేద మందును ఉంచి రోగులు మింగే విధంగా ప్రసాదాన్ని అందజేస్తారు. చేపలు తినలేని శాకాహారులకు అదే మందును బెల్లంతో(Jaggery) కలిపి అందిస్తున్నారు.
ప్రసాదం కోసం వచ్చిన ప్రజలకు ప్రభుత్వం విస్తృత సౌకర్యాలు కల్పించింది. వృద్ధులు, వికలాంగులు, వీఐపీల కోసం ప్రత్యేక కౌంటర్లను ఏర్పాటు చేశారు. ఎలాంటి అవాంఛనీయ ఘటనలు జరగకుండా పోలీసులు పటిష్ట భద్రతా ఏర్పాట్లు చేశారు. క్యూలైన్ల ద్వారా ప్రజలను క్రమబద్ధంగా పంపిస్తూ వాలంటీర్ల సహాయంతో ప్రసాదాన్ని అందజేస్తున్నారు. ఈ చేప ప్రసాదం పంపిణీ కార్యక్రమం ఈరోజు రాత్రి 9 గంటల వరకు కొనసాగనుంది.
