ఆంధ్రప్రదేశ్ రాష్ట్రంలో ముఖ్యమంత్రి నారా చంద్రబాబు నాయుడు అధ్యక్షతన జరిగిన కేబినెట్ సమావేశం కీలక నిర్ణయాలతో ముగిసింది. సచివాలయంలో దాదాపు 3 గంటలకు పైగా జరిగిన ఈ భేటీలో రాష్ట్ర అభివృద్ధికి దిశానిర్దేశం చేసే అనేక అంశాలపై చర్చించి నిర్ణయాలు తీసుకున్నారు.
రాజధాని అమరావతికి చట్టబద్ధత కల్పించిన కేంద్ర ప్రభుత్వానికి, ప్రధాని నరేంద్ర మోడీకి మంత్రి మండలి ధన్యవాదాలు తెలిపింది. అలాగే 16వ రాష్ట్ర పెట్టుబడుల ప్రోత్సాహక మండలిలో చర్చించిన ప్రతిపాదనలకు కేబినెట్ ఆమోదం తెలిపింది. మొత్తం రూ.39,436 కోట్ల విలువైన 31 ప్రాజెక్టులకు గ్రీన్ సిగ్నల్ ఇవ్వడం రాష్ట్ర పారిశ్రామిక అభివృద్ధికి కీలకంగా మారనుంది.
క్వాంటమ్ వ్యాలీ ప్రాజెక్ట్లో భాగంగా 3 కొత్త సంస్థల ఏర్పాటుకు కూడా కేబినెట్ అనుమతి ఇచ్చింది. ఈ ప్రాజెక్ట్ రాష్ట్రాన్ని సాంకేతిక రంగంలో ముందుకు తీసుకెళ్లే అడుగుగా భావిస్తున్నారు.
జోనల్ వ్యవస్థపై కూడా కేబినెట్లో చర్చ జరిగింది. పరిపాలనలో సమతుల్యత సాధించేందుకు తీసుకునే చర్యలపై అధికారులు వివరాలు సమర్పించారు. అదనంగా పలు పరిశ్రమలు, సంస్థలకు భూ కేటాయింపుల విషయంలో కూడా అనుమతులు ఇచ్చారు.
మొత్తం 60కి పైగా ఎజెండా అంశాలను పరిశీలించిన కేబినెట్, వాటిలో ముఖ్యమైన వాటికి ఆమోదం తెలిపింది. ఈ సమావేశం రాష్ట్ర అభివృద్ధికి కీలకమైన నిర్ణయాలతో ముగిసిందని అధికారులు తెలిపారు.
