తమిళనాడులో ప్రభుత్వ ఆసుపత్రుల్లో అవినీతి, అపరిశుభ్రత, వైద్య సేవల నాణ్యతపై వస్తున్న వరుస ఫిర్యాదుల నేపథ్యంలో ముఖ్యమంత్రి విజయ్ స్వయంగా రంగంలోకి దిగారు. ఎలాంటి ముందస్తు సమాచారం ఇవ్వకుండా చెన్నైలోని ఎగ్మూర్ ప్రాంతంలో ఉన్న ప్రముఖ ప్రభుత్వ పిల్లల ఆసుపత్రి ఇన్స్టిట్యూట్ ఆఫ్ చైల్డ్ హెల్త్ (ICH)లో ఆకస్మిక తనిఖీలు నిర్వహించారు. సీఎం అనూహ్యంగా ఆసుపత్రికి చేరుకుని వార్డులను పరిశీలించడంతో అధికారులు, సిబ్బంది ఒక్కసారిగా అప్రమత్తమయ్యారు.
రోగులతో నేరుగా మాట్లాడిన సీఎం విజయ్
ఆసుపత్రిలోని ప్రతి వార్డును పరిశీలించిన సీఎం విజయ్ అక్కడ చికిత్స పొందుతున్న రోగులు, వారి కుటుంబ సభ్యులతో నేరుగా మాట్లాడారు. ఆసుపత్రిలో అందుతున్న వైద్య సేవలు ఎలా ఉన్నాయి, మందులు ఉచితంగా అందుతున్నాయా, ఎవరైనా లంచాలు డిమాండ్ చేస్తున్నారా, సిబ్బంది వ్యవహార శైలి ఎలా ఉందనే అంశాలపై వివరాలు తెలుసుకున్నారు. ఈ సందర్భంగా చిన్నారులను ఆప్యాయంగా పలకరించిన సీఎం, బాలింతలతో మాట్లాడి వారి ఆరోగ్య పరిస్థితులతో పాటు అందుతున్న పౌష్టికాహారం గురించి కూడా ఆరా తీశారు.
అపరిశుభ్రతపై అధికారులకు సీఎం సీరియస్ వార్నింగ్
తనిఖీల సమయంలో ఆసుపత్రి ప్రాంగణం, వార్డుల పరిసరాల్లో అపరిశుభ్రత కనిపించడంతో సీఎం విజయ్ తీవ్ర అసంతృప్తి వ్యక్తం చేశారు. పసిపిల్లలు చికిత్స పొందే ఆసుపత్రిని ఇంత నిర్లక్ష్యంగా నిర్వహించడం ఏమాత్రం ఆమోదయోగ్యం కాదని అధికారులను, శానిటేషన్ సిబ్బందిని నిలదీశారు. ప్రభుత్వ ఆసుపత్రులకు వచ్చే పేద ప్రజలకు నాణ్యమైన వైద్య సేవలతో పాటు పరిశుభ్రమైన వాతావరణం కల్పించడం ప్రభుత్వ బాధ్యత అని స్పష్టం చేశారు. ఈ విషయంలో నిర్లక్ష్యాన్ని ఎట్టి పరిస్థితుల్లోనూ సహించబోమని హెచ్చరించారు.
రాష్ట్రవ్యాప్తంగా మరిన్ని ఆకస్మిక తనిఖీలకు సంకేతం
ప్రభుత్వ వైద్యరంగంలో జవాబుదారీతనం పెంచే లక్ష్యంతో రాష్ట్రవ్యాప్తంగా మరిన్ని ప్రభుత్వ ఆసుపత్రుల్లో కూడా ముందస్తు సమాచారం లేకుండా ఆకస్మిక తనిఖీలు నిర్వహిస్తానని సీఎం విజయ్ ప్రకటించారు. ముఖ్యమంత్రి తీసుకున్న ఈ నిర్ణయంతో తమిళనాడు ప్రభుత్వ యంత్రాంగం అప్రమత్తమవగా, ప్రభుత్వ ఆసుపత్రుల్లో సేవల నాణ్యత, పరిశుభ్రతపై మరింత దృష్టి పడే అవకాశం కనిపిస్తోంది.
