హైదరాబాద్ నగరంలో భారీ అగ్ని ప్రమాదం చోటుచేసుకుంది. గచ్చిబౌలి పోలీస్ స్టేషన్ పరిధిలోని టీఎన్జీవో కాలనీలో సోమవారం ఉదయం ఒక అపార్ట్మెంట్ సెల్లార్లో ఒక్కసారిగా మంటలు చెలరేగడంతో స్థానికులు భయాందోళనకు గురయ్యారు.
షార్ట్ సర్క్యూట్తో మంటలు.. ఇద్దరికి అస్వస్థత
సెల్లార్లో ఉన్న ఎలక్ట్రికల్ ప్యానెల్ బోర్డులో షార్ట్ సర్క్యూట్ కారణంగా మంటలు ప్రారంభమైనట్లు అధికారులు తెలిపారు. అక్కడ పార్క్ చేసిన ద్విచక్ర వాహనాలకు మంటలు వేగంగా వ్యాపించడంతో దట్టమైన పొగ అపార్ట్మెంట్ అంతటా వ్యాపించింది. పై అంతస్తుల్లో ఉన్న నివాసితులు ఊపిరాడక ఇబ్బందులు ఎదుర్కొన్నారు.
సమాచారం అందుకున్న వెంటనే అగ్నిమాపక సిబ్బంది ఘటనాస్థలానికి చేరుకుని సహాయక చర్యలు చేపట్టారు. అపార్ట్మెంట్లో చిక్కుకున్న వారిని నిచ్చెనల సహాయంతో సురక్షితంగా బయటకు తీసుకువచ్చారు.
ఈ ఘటనలో సుమారు 15 ద్విచక్ర వాహనాలు పూర్తిగా దగ్ధమయ్యాయి. పొగ పీల్చడం వల్ల ఇద్దరు వ్యక్తులు అస్వస్థతకు గురికాగా, వారిని సమీప ఆసుపత్రికి తరలించి చికిత్స అందిస్తున్నారు.
అగ్నిమాపక సిబ్బంది వేగంగా స్పందించడంతో పెద్ద ప్రమాదం తప్పిందని అధికారులు వెల్లడించారు. ప్రస్తుతం ఆస్తి నష్టంపై అంచనా వేస్తున్నారు.
