భారత్(India), ఆఫ్గనిస్తాన్ (Afghanistan) మధ్య 3 మ్యాచ్ల వన్డే సిరీస్కు (ODI Series) నేడు ధర్మశాల (Dharamshala) వేదికగా తెరలేచింది. హిమాచల్ ప్రదేశ్ క్రికెట్ అసోసియేషన్ స్టేడియంలో (Himachal Pradesh Cricket Association Stadium) జరగనున్న తొలి వన్డేతో 2027 వన్డే ప్రపంచకప్ సన్నాహకాలను టీమిండియా ప్రారంభించనుంది. శుభ్మన్ గిల్ (Shubman Gill) కెప్టెన్సీలో బరిలోకి దిగుతున్న భారత జట్టుకు ఈ సిరీస్ కీలకంగా మారింది. అయితే స్టార్ ఆటగాళ్లు విరాట్ కోహ్లీ, హార్దిక్ పాండ్యా గాయాలతో దూరం కావడం జట్టుకు పెద్ద ఎదురుదెబ్బగా మారింది.
హ్యామ్స్ట్రింగ్ గాయం కారణంగా విరాట్ కోహ్లీ మొత్తం సిరీస్కు దూరమయ్యాడు. దీంతో నంబర్-3 స్థానంలో ఎవరికి అవకాశం దక్కుతుందనే అంశం ఆసక్తికరంగా మారింది. ఇషాన్ కిషన్, కేఎల్ రాహుల్, యశస్వి జైస్వాల్ మధ్య తీవ్ర పోటీ నెలకొంది. భారత బౌలింగ్ కోచ్ మోర్నే మోర్కెల్ (Morne Morkel) మాట్లాడుతూ ఈ సిరీస్లో పలువురు ఆటగాళ్లను నంబర్-3 స్థానంలో పరీక్షించే ఆలోచనలో ఉన్నట్లు వెల్లడించాడు.
ఇక గాయం నుంచి పూర్తిగా కోలుకున్న రోహిత్ శర్మ (Rohit Sharma) మళ్లీ జట్టులోకి రావడం అభిమానుల్లో ఉత్సాహాన్ని నింపింది. ఐపీఎల్ 2026 సమయంలో గాయపడిన రోహిత్ తాజాగా ఫిట్నెస్ టెస్ట్లో (Fitness Test) ఉత్తీర్ణత సాధించి ఓపెనర్గా బరిలోకి దిగనున్నాడు. 39 ఏళ్ల 44 రోజుల వయసులో వన్డే ఆడనున్న రోహిత్, భారత తరఫున అత్యధిక వయసులో వన్డే ఆడిన ఆటగాడిగా కొత్త రికార్డు సృష్టించనున్నాడు.
మరోవైపు క్వాడ్రిసెప్స్ గాయం కారణంగా హార్దిక్ పాండ్యా (Hardik Pandya) కూడా ఈ సిరీస్కు దూరమయ్యాడు. అతని స్థానంలో నితీష్ కుమార్ రెడ్డిపై (Nitish Kumar Reddy) జట్టు యాజమాన్యం భారీ ఆశలు పెట్టుకుంది. ఆల్రౌండర్గా నితీష్ కీలక బాధ్యతలు నిర్వర్తించే అవకాశం కనిపిస్తోంది. అలాగే జస్ప్రీత్ బుమ్రా, మహ్మద్ సిరాజ్లకు విశ్రాంతి ఇవ్వడంతో యువ పేసర్లు ప్రిన్స్ యాదవ్ లేదా గుర్నూర్ బ్రార్లో ఒకరు అంతర్జాతీయ అరంగేట్రం చేసే అవకాశాలు ఉన్నాయి.
ఆఫ్గనిస్తాన్ జట్టుకు స్టార్ స్పిన్నర్ రషీద్ ఖాన్ (Rashid Khan) తిరిగి రావడం పెద్ద బలంగా మారింది. ఇబ్రహీం జద్రాన్, రహ్మానుల్లా గుర్బాజ్, అజ్మతుల్లా ఒమర్జాయ్ వంటి కీలక ఆటగాళ్లతో ఆఫ్గాన్ జట్టు కూడా గట్టి పోటీకి సిద్ధమైంది. ముఖ్యంగా ధర్మశాల పిచ్ పరిస్థితులను దృష్టిలో పెట్టుకుని తమ వ్యూహాలను సిద్ధం చేసుకుంది.
అయితే తొలి వన్డేపై వర్షం ముప్పు (Rain Threat) నెలకొంది. శుక్రవారం రాత్రి ధర్మశాలలో భారీ వర్షం కురవగా, శనివారం ఉదయం కూడా మేఘావృత వాతావరణం కొనసాగింది. మ్యాచ్ ప్రారంభానికి ముందు మరోసారి వర్షం కురిసే అవకాశాలు ఉన్నట్లు వాతావరణ శాఖ తెలిపింది. రాత్రి వరకు వర్ష సూచనలు ఉండటంతో మ్యాచ్కు అంతరాయం కలిగే అవకాశాలు కనిపిస్తున్నాయి.
ధర్మశాల పిచ్ సంప్రదాయంగా పేసర్లకు (Pacers) అనుకూలంగా ఉంటుంది. మేఘావృత పరిస్థితులు, పిచ్పై తేమ కారణంగా కొత్త బంతితో మంచి స్వింగ్ లభించే అవకాశం ఉంది. దీంతో టాస్ గెలిచిన జట్టు ముందుగా బౌలింగ్ ఎంచుకునే అవకాశాలు ఎక్కువగా కనిపిస్తున్నాయి. శుక్రవారం ఇరు జట్లు నెట్స్లో తీవ్రంగా శ్రమించాయి. బ్యాటింగ్, బౌలింగ్తో పాటు ఫీల్డింగ్ డ్రిల్స్పై ప్రత్యేక దృష్టి పెట్టాయి.
మ్యాచ్ భారత కాలమానం ప్రకారం మధ్యాహ్నం 1:30 గంటలకు ప్రారంభం కానుంది. స్టార్ స్పోర్ట్స్ నెట్వర్క్లో (Star Sports Network) ప్రత్యక్ష ప్రసారం ఉండగా, జియో హాట్స్టార్లో (Jio Hotstar) లైవ్ స్ట్రీమింగ్ అందుబాటులో ఉంటుంది.
భారత్ ప్లేయింగ్ XI:
శుభ్మన్ గిల్ (కెప్టెన్), రోహిత్ శర్మ, ఇషాన్ కిషన్, శ్రేయస్ అయ్యర్, కేఎల్ రాహుల్, నితీష్ కుమార్ రెడ్డి, వాషింగ్టన్ సుందర్, కుల్దీప్ యాదవ్, అర్ష్దీప్ సింగ్, ప్రసిద్ధ్ కృష్ణ, ప్రిన్స్ యాదవ్ లేదా గుర్నూర్ బ్రార్.
ఆఫ్గనిస్తాన్ ప్లేయింగ్ XI:
ఇబ్రహీం జద్రాన్, రహ్మానుల్లా గుర్బాజ్, సదీకుల్లా అతల్, రహ్మత్ షా, హష్మతుల్లా షాహిది (కెప్టెన్), అజ్మతుల్లా ఒమర్జాయ్, ఇక్రమ్ అలీఖిల్, రషీద్ ఖాన్, మహ్మద్ సలీమ్, ఏఎం ఘజన్ఫర్, జియౌర్ రెహ్మాన్.
