జనసేనలో (Janasena Party) పెరుగుతున్న అవినీతి ఆరోపణలు (Corruption Allegations), ప్రజల్లో పెరుగుతున్న చర్చలు ఉప ముఖ్యమంత్రి పవన్ కళ్యాణ్ (Pawan Kalyan) ను తీవ్ర అసహనానికి గురిచేశాయి. విజయవాడలో నిర్వహించిన సమావేశంలో ఆయన పార్టీ ఎమ్మెల్యేలు, ఎంపీ, ఎమ్మెల్సీలపై తీవ్ర అసంతృప్తి వ్యక్తం చేశారు. కొందరు ప్రజాప్రతినిధులు పరిశ్రమలను బెదిరిస్తూ వసూళ్లకు పాల్పడుతున్నారనే ఆరోపణలు రావడం పార్టీ ప్రతిష్టకు ముప్పుగా మారిందని ఆయన హెచ్చరించారు. ప్రజలు నమ్మి ఇచ్చిన అవకాశాన్ని దుర్వినియోగం చేస్తే అది పార్టీ గౌరవానికి నష్టం కలిగిస్తుందని స్పష్టం చేశారు. బహిరంగంగా చేస్తున్న అవినీతితో (Corruption) ప్రజల్లో అసహనం పెరిగిన సంకేతాలు కనిపిస్తున్నాయని ఆందోళణ వ్యక్తం చేశారు.
ఇక సభ్యత్వ నమోదు (Membership Registration) విషయంలోనూ వెనుకబాటు ఉండడంపై ఆయన తీవ్రంగా ప్రశ్నించారు. ఎన్నికల సమయంలో అధిక టికెట్లు కోరాలంటే పార్టీ బలాన్ని పెంచాల్సిన అవసరం ఉందని సూచించారు. అయితే కూటమిలో తగిన ప్రాధాన్యం దక్కడం లేదని, తెలుగుదేశం (Telugu Desam Party) ప్రభావం అధికంగా ఉండటంతో తమకు పనులు సాధించడం కష్టమవుతోందని కొందరు జనసేన ప్రజాప్రతినిధులు లోలోపల అసంతృప్తి వ్యక్తం చేస్తున్నట్లు తెలుస్తోంది.
మరోవైపు ముఖ్యమంత్రి చంద్రబాబు (Nara Chandrababu Naidu) పై పవన్ కళ్యాణ్ చూపుతున్న బలమైన మద్దతు కూడా పార్టీ లోపల చర్చకు దారితీస్తోంది. ఇది కేవలం ప్రజలకే కాకుండా జనసేన కార్యకర్తలకు కూడా అసౌకర్యాన్ని కలిగిస్తోందనే అభిప్రాయాలు వ్యక్తమవుతున్నాయి. ఈ పరిణామాల మధ్య జనసేనలో అంతర్గత విభేదాలు మరింత ముదురుతాయా అనే సందేహాలు వ్యక్తమవుతున్నాయి.
