సుమంత్ ప్రధాన పాత్రలో తెరకెక్కుతున్న డివోషనల్ మిస్టరీ థ్రిల్లర్ ‘మహేంద్రగిరి వారాహి’. రాజశ్యామల ఎంటర్టైన్మెంట్స్, బ్రిడ్జ్ ఫిలిమ్స్ బ్యానర్లపై లక్ష్మణ్, కలిపు మధు ఈ చిత్రాన్ని భారీ బడ్జెట్తో నిర్మిస్తున్నారు. సంతోష్ జగర్లపూడి దర్శకత్వం వహిస్తున్న ఈ మూవీ థియేట్రికల్ ట్రైలర్ను తాజాగా ఘనంగా విడుదల చేశారు.
భక్తి, ఆధ్యాత్మికత, మిస్టరీ, సస్పెన్స్ అంశాలతో రూపొందించిన ట్రైలర్ సినిమాపై ఆసక్తిని మరింత పెంచుతోంది. మహేంద్రగిరిలో కొలువైన గ్రామదేవత వారాహి మాత చుట్టూ ఈ కథ నడుస్తుంది. పరమశివుడి ఆజ్ఞతో అక్కడ కొలువుదీరిన అమ్మవారి చుట్టూ ఎన్నో రహస్యాలు దాగి ఉన్నట్లు ట్రైలర్ ద్వారా తెలుస్తోంది.
మహేంద్రగిరి రాజకుటుంబానికి చెందిన వ్యక్తులు గత 150 ఏళ్లుగా అనుమానాస్పద పరిస్థితుల్లో వరుసగా మరణిస్తుంటారు. ఈ మరణాలన్నీ వారాహి మాత శాపం కారణంగానే జరుగుతున్నాయని స్థానికులు నమ్ముతుంటారు. అయితే ఈ వరుస మరణాల వెనుక అసలు కారణం ఏంటి? నిజంగానే అమ్మవారి శాపమే కారణమా? అనే ప్రశ్నలు సినిమాపై ఉత్కంఠను పెంచుతున్నాయి.
ఈ మిస్టరీని ఛేదించేందుకు హీరో చేసే ప్రయత్నాలు, అతడికి ఎదురయ్యే సవాళ్లను ట్రైలర్లో ఆసక్తికరంగా చూపించారు. భక్తి భావనతో పాటు థ్రిల్లింగ్ ఎలిమెంట్స్ను మేళవిస్తూ దర్శకుడు సంతోష్ జగర్లపూడి సినిమాను తెరకెక్కించినట్లు ట్రైలర్ చూస్తే అర్థమవుతోంది.
ఇక ఈ సినిమాలో సుమంత్ తన పవర్ఫుల్ నటనతో ఆకట్టుకుంటున్నాడు. వారాహి మాత పాత్రలో ఐశ్వర్య రాజేష్ కనిపించనున్నారు. అయితే ట్రైలర్లో అనూహ్యంగా ‘స్టార్ బాయ్’ సిద్ధు జొన్నలగడ్డ ఎంట్రీ ఇవ్వడం ప్రత్యేక ఆకర్షణగా నిలిచింది. సిద్ధు కీలక పాత్రలో కనిపించనున్నట్లు తెలియడంతో సినిమాపై అంచనాలు ఒక్కసారిగా పెరిగిపోయాయి.
మినాక్షి గోస్వామి, మాళవిక నాయర్, బ్రహ్మానందం, వెన్నెల కిశోర్, రాజీవ్ కనకాల, అలీ తదితరులు ఈ చిత్రంలో కీలక పాత్రలు పోషిస్తున్నారు. 150 ఏళ్లుగా కొనసాగుతున్న వరుస మరణాల వెనుక ఉన్న అసలు మిస్టరీని ‘మహేంద్రగిరి వారాహి’లో ఎలా ఛేదించారనేది ఆసక్తికరంగా మారింది.
