కేసీఆర్(KCR) పాలనలో ప్రజా సమస్యలకు (Public Issues) పరిష్కారాలు (Solutions) చూపిస్తే.. రేవంత్ రెడ్డి(Revanth Reddy) ప్రభుత్వం మాత్రం కొత్త సమస్యలను సృష్టిస్తోందని మాజీ మంత్రి, బీఆర్ఎస్(BRS) ఎమ్మెల్యే హరీష్ రావు (Harish Rao) విమర్శించారు. కాంగ్రెస్ (Congress) పాలనలో ప్రజలకు ఉపశమనం కంటే ఇబ్బందులే ఎక్కువయ్యాయని ఆరోపించారు. ప్రజాపాలన పేరుతో తెలంగాణలో భూదోపిడీకి (Land Exploitation) తెరలేపుతున్నారని మండిపడ్డారు.
ముఖ్యంగా 22-ఏ భూముల (22-A Lands) వ్యవహారంపై హరీష్ రావు తీవ్ర ఆగ్రహం వ్యక్తం చేశారు. కొత్తగా ఒక్క సెంటు భూమిని కూడా నిషేధిత జాబితాలో చేర్చలేదని రెవెన్యూ మంత్రి పొంగులేటి శ్రీనివాస్ రెడ్డి (Ponguleti Srinivas Reddy) చెబుతున్నప్పటికీ.. క్షేత్రస్థాయిలో పరిస్థితి భిన్నంగా ఉందని అన్నారు. ప్రజల సొంత భూములు, కాలనీలు, అపార్ట్‌మెంట్లు, గ్రామాలు సైతం నిషేధిత జాబితాలోకి వెళ్లిపోయాయని ఆరోపించారు.
భూములపై ఆంక్షల కారణంగా ప్రజలు తమ అవసరాలకు భూమిని విక్రయించుకోలేక పిల్లల చదువులు(Children’s Education), ఆడపిల్లల వివాహాల (Girls’ Marriages) విషయంలో ఇబ్బందులు ఎదుర్కొంటున్నారని హరీష్ రావు అన్నారు. నల్లగొండ జిల్లాలో భూమి సమస్య కారణంగా ఓ కుటుంబంలో వివాహం ఆగిపోయే పరిస్థితి ఏర్పడిందని, గ్రామస్థులు కలిసి ఆ వివాహాన్ని జరిపించారని గుర్తుచేశారు.
22-ఏ భూముల వ్యవహారానికి రెవెన్యూ శాఖే (Revenue Department) బాధ్యత వహించాలని హరీష్ రావు డిమాండ్ చేశారు. ప్రజలకు ఇబ్బందులు కలిగిస్తున్న అంశంపై మంత్రి పొంగులేటి శ్రీనివాస్ రెడ్డి సమాధానం చెప్పాలని, బాధ్యత తీసుకోకపోతే తన పదవికి రాజీనామా చేయాలని డిమాండ్ చేశారు.
హైదరాబాద్‌లోని (Hyderabad) ప్రభుత్వ భూములు, విద్యాసంస్థల భూములపైనా ప్రభుత్వం కన్నేసిందని హరీష్ రావు ఆరోపించారు. హైదరాబాద్ సెంట్రల్ యూనివర్సిటీ (University of Hyderabad) పరిధిలోని 400 ఎకరాల భూమిని(Land) స్వాధీనం చేసుకునేందుకు ప్రయత్నాలు జరుగుతున్నాయని అన్నారు. మేడ్చల్ జిల్లాలో సుమారు 8 వేల ఎకరాల భూమిని కుదువపెట్టి మరో రూ.10 వేల కోట్ల అప్పులు తీసుకొచ్చారని ఆరోపిస్తూ.. రాష్ట్ర ఆస్తులను వినియోగించి అప్పులు తెచ్చే విధానంపై ప్రభుత్వం స్పష్టత ఇవ్వాలని డిమాండ్ చేశారు.
హైడ్రా(HYDRA), మూసీ సుందరీకరణ ప్రాజెక్టులపైనా (Musi Beautification Projects) హరీష్ రావు విమర్శలు చేశారు. పెద్దల నిర్మాణాలను పట్టించుకోకుండా సామాన్యుల ఇళ్లపై మాత్రమే చర్యలు తీసుకుంటున్నారని ఆరోపించారు. మూసీ అభివృద్ధి పేరుతో సుమారు 3 వేల ఎకరాల భూమిని వ్యాపార ప్రయోజనాలకు వినియోగించేలా ప్రణాళికలు ఉన్నాయని విమర్శించారు.
కాంగ్రెస్ ప్రభుత్వంలో 30 శాతం కమీషన్ పాలన సాగుతోందని ప్రజలు మాట్లాడుకుంటున్నారని హరీష్ రావు ఆరోపించారు. తప్పులు చేస్తున్న ప్రభుత్వమే వాటిని ప్రశ్నిస్తున్న వారిపై ఎదురుదాడికి దిగుతోందని మండిపడ్డారు. ప్రజల భూములు, ఆస్తులకు సంబంధించిన నిర్ణయాల్లో ప్రభుత్వం పారదర్శకంగా వ్యవహరించాలని, ముఖ్యంగా 22-ఏ భూముల సమస్యను వెంటనే పరిష్కరించి ప్రజలకు భరోసా కల్పించాలని డిమాండ్ చేశారు.
