మెగా హీరో సాయిధరమ్ తేజ్ నటిస్తున్న పీరియాడిక్‌ యాక్షన్‌ డ్రామా ‘సంబరాల ఏటిగట్టు’ (SYG) నుంచి విడుదలైన ‘అసుర ఆగమనం’ గ్లింప్స్‌ ప్రేక్షకుల్లో ఆసక్తిని పెంచుతోంది. దర్శకుడు రోహిత్‌ కేపీ తెరకెక్కిస్తున్న ఈ చిత్రంలో తేజ్ రగ్గడ్‌ లుక్‌లో యోధుడిగా కనిపిస్తూ ఆకట్టుకున్నారు.
బానిసత్వం, గనులు, అణచివేత నేపథ్యంలో సాగే ఈ సినిమాలో అన్యాయంపై తిరుగుబాటు చేసే పాత్రలో సాయిదుర్గా తేజ్ కనిపించనున్నారు. “అసుర సంధ్యవేళ మొదలైంది.. రాక్షసుల ఆగమనం!” అంటూ కత్తిని పైకెత్తి ఆయన ఇచ్చిన ఎంట్రీ గ్లింప్స్‌కు ప్రధాన ఆకర్షణగా నిలిచింది. బీజే అజనీష్‌ లోక్‌నాథ్‌ నేపథ్య సంగీతం, విజువల్స్‌ ఉత్కంఠను పెంచాయి.
ప్రైమ్‌షో ఎంటర్‌టైన్‌మెంట్‌ పతాకంపై కె.నిరంజన్‌ రెడ్డి, చైతన్య రెడ్డి భారీ బడ్జెట్‌తో ఈ చిత్రాన్ని నిర్మిస్తున్నారు. ఐశ్వర్య లక్ష్మి కథానాయికగా నటిస్తున్న ఈ సినిమా ప్రస్తుతం నిర్మాణానంతర పనుల్లో ఉంది. పాటలను త్వరలో విడుదల చేయనున్నారు.
‘సంబరాల ఏటిగట్టు’ను 2027 జనవరి 12న ప్రపంచవ్యాప్తంగా థియేటర్లలో విడుదల చేయడానికి చిత్ర బృందం సిద్ధమవుతోంది. తాజా గ్లింప్స్‌తో సినిమాపై అంచనాలు పెరగగా, సంక్రాంతి బాక్సాఫీస్‌ వద్ద ఈ చిత్రం ఎలాంటి స్పందన అందుకుంటుందో చూడాలి.
