తెలుగు చిత్ర పరిశ్రమలో వరుస విజయాలతో తన మార్కెట్‌ను పెంచుకుంటున్న నేచురల్ స్టార్ నాని (Natural Star Nani) ఇప్పుడు ది ప్యారడైజ్ (The Paradise) సినిమాతో ప్రేక్షకుల ముందుకు రాబోతున్నారు. దసరా తర్వాత దర్శకుడు శ్రీకాంత్ ఓదెలతో(Srikanth Odela) నాని మరోసారి జతకట్టడంతో ఈ సినిమాపై భారీ అంచనాలు నెలకొన్నాయి. ఇదే సమయంలో సినిమాకు సంబంధించిన థియేట్రికల్ బిజినెస్ (Theatrical Business) కూడా భారీ స్థాయిలో జరిగినట్లు సమాచారం.
2023లో విడుదలైన దసరా సినిమా తెలుగు రాష్ట్రాల్లో సుమారు రూ.30 కోట్ల థియేట్రికల్ బిజినెస్ చేసింది. అయితే దాదాపు 3 ఏళ్ల తర్వాత అదే కాంబినేషన్‌లో వస్తున్న ది ప్యారడైజ్ చిత్రానికి తెలుగు రాష్ట్రాలతో పాటు ఓవరాల్ థియేట్రికల్ హక్కులు కలిపి రూ.100 కోట్లకు పైగా ప్రీ-రిలీజ్ బిజినెస్ జరిగినట్లు ట్రేడ్ వర్గాల్లో ప్రచారం జరుగుతోంది.
దసరా విజయంతో నాని, శ్రీకాంత్ ఓదెల కాంబినేషన్‌పై అంచనాలు పెరగడంతో పాటు నాని వరుస విజయాలు, విభిన్న కథల ఎంపికతో మార్కెట్‌ను మరింత విస్తరించుకున్నారు. శ్రీకాంత్ ఓదెల మాస్ ఎమోషనల్ మేకింగ్‌పై ఉన్న అంచనాలు కూడా ది ప్యారడైజ్ భారీ బిజినెస్‌కు కారణంగా చెబుతున్నారు.
అయితే రూ.100 కోట్లకు పైగా జరిగిన థియేట్రికల్ బిజినెస్‌ను ది ప్యారడైజ్ ఎంతవరకు రికవరీ చేస్తుందనేది ఇప్పుడు ఆసక్తికరంగా మారింది. సినిమాకు వచ్చే ఓపెనింగ్స్, ప్రేక్షకుల టాక్, వీకెండ్ తర్వాత కొనసాగే వసూళ్లు కీలకం కానున్నాయి. భారీ ధరలకు హక్కులు కొనుగోలు చేసిన నేపథ్యంలో తొలి రోజు టాక్ సినిమాకు చాలా కీలకంగా మారే అవకాశం ఉందని ట్రేడ్ వర్గాల్లో చర్చ జరుగుతోంది.
