ఆంధ్రప్రదేశ్‌లో పురపాలక ఎన్నికల (Municipal Elections) సందడి మొదలైంది. రిజర్వేషన్లు (Reservations) ఖరారు కావడంతో రాజకీయ పార్టీలు అభ్యర్థుల ఎంపికపై దృష్టి సారించగా, అధికార యంత్రాంగం (Administration) పోలింగ్ ఏర్పాట్లను (Polling Arrangements) వేగవంతం చేసింది. ఇదే సమయంలో అధికార కూటమిలో సీట్ల పంపకాల వ్యవహారం కొత్త రాజకీయ చర్చకు దారితీస్తోంది. ముఖ్యంగా తెలుగుదేశం పార్టీ(TDP), జనసేన(Jana Sena) మధ్య స్థానిక ఎన్నికల సీట్ల సర్దుబాటు ఇంకా కొలిక్కి రాకపోవడం ఆసక్తిని రేకెత్తిస్తోంది.
రాష్ట్రంలోని 17 మున్సిపల్ కార్పొరేషన్లు, 106 మున్సిపాలిటీలు, నగర పంచాయతీల్లో స్థానిక ఎన్నికల నిర్వహణకు సన్నాహాలు కొనసాగుతున్నాయి. తొలి విడతలో 13 కార్పొరేషన్లు, 87 మున్సిపాలిటీల పరిధిలో ఎన్నికల ఏర్పాట్లు చేపట్టగా, మిగిలిన 23 పట్టణ స్థానిక సంస్థల్లో రెండో విడతలో ఎన్నికలు నిర్వహించేందుకు అధికారులు సిద్ధమవుతున్నారు. పోలింగ్ కేంద్రాల తుది జాబితా రూపకల్పనతో పాటు ఎన్నికల సామగ్రిని జిల్లా కేంద్రాలకు తరలించే ప్రక్రియ కూడా కొనసాగుతోంది.
మరోవైపు, వైఎస్సార్ కాంగ్రెస్ పార్టీ(YSRCP) అధినేత వైఎస్ జగన్ మోహన్ రెడ్డి (YS Jagan Mohan Reddy) స్థానిక ఎన్నికలపై ప్రత్యేక దృష్టి సారించారు. పార్టీ ప్రాంతీయ సమన్వయకర్తలతో సుమారు ఆరు గంటలకు పైగా సమావేశమై జిల్లాలవారీగా పార్టీ పరిస్థితులు, అభ్యర్థుల ఎంపిక, ప్రచార వ్యూహాలు, ఎన్నికల సన్నద్ధతపై చర్చించినట్లు పార్టీ వర్గాలు వెల్లడించాయి. మేయర్లు(Mayors), మున్సిపల్ చైర్మన్ల (Municipal Chairpersons) ఎంపికతో పాటు బరిలో నిలిపే అభ్యర్థుల జాబితాను త్వరలో ఖరారు చేసే అవకాశం ఉందని తెలుస్తోంది.
ఇదిలా ఉండగా, టీడీపీ–జనసేన మధ్య సీట్ల పంపకాలపై అధికారిక ప్రకటన వెలువడకముందే జనసేన కోరుతున్న వాటాపై రాజకీయ వర్గాల్లో చర్చ మొదలైంది. జనసేనకు మూడు మేయర్ పదవులు, సుమారు 17 శాతం సీట్లు కేటాయించనున్నట్లు ప్రచారం జరగడం ఆ పార్టీ వర్గాల్లో అసంతృప్తికి కారణమైందనే ఊహాగానాలు వినిపిస్తున్నాయి. అయితే జనసేన నేతలు మాత్రం స్థానిక సంస్థల ఎన్నికల్లో తమకు గణనీయమైన వాటా దక్కాలని కోరుతున్నట్లు తెలుస్తోంది.
ఈ నేపథ్యంలో జనసేన నేత, మంత్రి కందుల దుర్గేష్ (Minister Kandula Durgesh) సోషల్ మీడియాలో చేసిన పోస్టులు రాజకీయంగా ప్రాధాన్యం సంతరించుకున్నాయి. ఆ పోస్టుల్లో పేర్కొన్న ప్రతిపాదనల ప్రకారం, కార్పొరేషన్లు, మున్సిపాలిటీలు, నగర పంచాయతీల్లోని వివిధ పదవులను కలిపి సుమారు 40.1 శాతం వాటాతో 2,091 పదవులు జనసేనకు కేటాయించాలని ప్రతిపాదించినట్లు ప్రచారం జరుగుతోంది.
మున్సిపల్ కార్పొరేషన్లలోని మేయర్ పదవుల్లో 35 శాతం వాటా ప్రకారం ఆరు పదవులు, డిప్యూటీ మేయర్ పదవుల్లో ఆరు, స్టాండింగ్ కమిటీ చైర్‌పర్సన్ పదవుల్లో ఐదు పదవులు జనసేనకు కేటాయించాలని ప్రతిపాదించినట్లు ఆ వివరాలు సూచిస్తున్నాయి. అదేవిధంగా మున్సిపాలిటీల్లో చైర్‌పర్సన్, వైస్ చైర్‌పర్సన్ పదవులతో పాటు నగర పంచాయతీల్లోనూ నిర్దిష్ట వాటాను జనసేన కోరుతున్నట్లు తెలుస్తోంది. వార్డులు, డివిజన్లలో కౌన్సిలర్లు, కార్పొరేటర్ల పదవులకు సంబంధించి కూడా 40 శాతం వాటా కోరినట్లు సోషల్ మీడియా పోస్టుల్లో పేర్కొన్నారు.
అయితే, ఈ ప్రతిపాదనలకు సంబంధించి కూటమి నుంచి అధికారిక ప్రకటన వెలువడలేదు. సీట్ల సర్దుబాటు చర్చలు కొనసాగుతున్న సమయంలోనే జనసేన నేతలు తమ వాటా వివరాలను బహిరంగంగా వెల్లడించడం రెండు పార్టీల మధ్య చర్చనీయాంశంగా మారింది. కొందరు టీడీపీ మద్దతుదారులు ఈ పరిణామాలను బ్లాక్ మేయిల్ రాజకీయాలుగా అభివర్ణిస్తుండగా, జనసేన మద్దతుదారులు మాత్రం తమకు తగిన ప్రాతినిధ్యం కల్పించాల్సిందేనని సోషల్ మీడియాలో స్పందిస్తున్నారు.
మంత్రి, ఎమ్మెల్యే స్థాయి నేతలు సైతం వాటా వివరాలను బహిరంగంగా ప్రస్తావించడంపై కూటమి అంతర్గత చర్చల్లో దీనికి ఎలాంటి ప్రాధాన్యం ఉందనే ప్రశ్నలు తలెత్తుతున్నాయి. ఈ పరిణామాలకు పవన్ కల్యాణ్ అనుమతి ఉందనే చర్చ కూడా రాజకీయ వర్గాల్లో వినిపిస్తుంది.
మొత్తంగా, ఒకవైపు వైఎస్సార్‌సీపీ అభ్యర్థుల ఎంపిక, ఎన్నికల వ్యూహాలపై కసరత్తు చేస్తుండగా, మరోవైపు అధికార కూటమిలో సీట్ల పంపకాల చర్చ కొనసాగుతోంది. జనసేన కోరుతున్న వాటా, టీడీపీ స్పందన, తుది సర్దుబాటుపై వెలువడే అధికారిక ప్రకటన స్థానిక ఎన్నికల రాజకీయాల్లో కీలక అంశాలుగా మారాయి.
