వైఎస్సార్‌ కడప జిల్లాలోని మైదుకూరు మున్సిపాలిటీ ఎన్నికలను వాయిదా వేస్తున్నట్లు రాష్ట్ర ఎన్నికల కమిషనర్‌ అనిల్‌ చంద్ర పునేఠా ప్రకటించారు. సోమవారం విజయవాడలో నిర్వహించిన మీడియా సమావేశంలో ఈ నిర్ణయాన్ని వెల్లడించారు. మున్సిపాలిటీలో ఎన్నికల ప్రక్రియను తిరిగి ప్రారంభించేందుకు త్వరలోనే కొత్త నోటిఫికేషన్‌ జారీ చేస్తామని తెలిపారు.
మైదుకూరు మున్సిపాలిటీ ఎన్నికల నామినేషన్ ప్రక్రియలో 18 మంది అభ్యర్థులకు సంబంధించిన 19 నామినేషన్ పత్రాలను చించివేశారు. దీంతో నామినేషన్ల పరిశీలన కష్టతరంగా మారిందని ఎస్ఈసీ వివరించారు. ఈ ఘటనపై జిల్లా కలెక్టర్‌ సమర్పించిన నివేదికను పరిశీలించిన అనంతరం ఎన్నికలను వాయిదా వేయాలని నిర్ణయించినట్లు స్పష్టం చేశారు. త్వరలోనే కొత్త నోటిఫికేషన్‌ విడుదల చేసి ఎన్నికల ప్రక్రియను మళ్లీ చేపట్టనున్నట్లు వెల్లడించారు.
