తమిళనాడు రాజకీయాల్లో కొత్త రాజకీయ పార్టీ ఆవిర్భవించనుందా? బీజేపీ మాజీ రాష్ట్ర అధ్యక్షుడు, మాజీ ఐపీఎస్ అధికారి కే. అన్నామలై త్వరలో సొంత రాజకీయ పార్టీ ఏర్పాటు చేయనున్నట్లు ప్రకటించినట్టు సమాచారం. పళనిలో జరిగిన కార్యక్రమంలో తన రాజకీయ భవిష్యత్తుపై ఆయన చేసిన వ్యాఖ్యలు చర్చనీయాంశంగా మారాయి.
2011 బ్యాచ్‌కు చెందిన కర్ణాటక క్యాడర్ ఐపీఎస్ అధికారిగా పనిచేసిన అన్నామలై, ఉద్యోగానికి రాజీనామా చేసిన తర్వాత బీజేపీలో చేరారు. తమిళనాడులో పార్టీ బలోపేతానికి కృషి చేశారు. ఇటీవల రాష్ట్ర అధ్యక్ష పదవి నుంచి తప్పుకున్న ఆయన, ఇప్పుడు కొత్త రాజకీయ వేదిక దిశగా అడుగులు వేస్తున్నట్లు తెలుస్తోంది.
ప్రజా సమస్యలపై పనిచేసేందుకు అన్నామలై ‘వి ది లీడర్స్’ పేరుతో సామాజిక ఉద్యమాన్ని ప్రారంభించారు. డ్రగ్స్‌ వ్యతిరేక అవగాహన, పర్యావరణ పరిరక్షణ వంటి అంశాలపై కార్యక్రమాలు చేపడుతున్నారు. రాబోయే స్థానిక సంస్థల ఎన్నికల్లో ఈ వేదిక తరఫున అభ్యర్థులను నిలబెట్టనున్నట్లు కూడా ప్రకటించినట్టు సమాచారం.
ద్రవిడ పార్టీలకు బలమైన పట్టు ఉన్న తమిళనాడులో అన్నామలై కొత్త రాజకీయ పార్టీ ఏర్పాటు చేస్తే రాజకీయ సమీకరణాలపై ఆసక్తి పెరగనుంది. ‘వి ది లీడర్స్’ సామాజిక ఉద్యమంగానే కొనసాగుతుందా? రాజకీయ పార్టీగా రూపుదిద్దుకుంటుందా? స్థానిక ఎన్నికల్లో ఎలాంటి పాత్ర పోషిస్తుందా? అన్నది వేచి చూడాలి.
అయితే, పార్టీ పేరు, విధివిధానాలు, అధికారిక ప్రారంభ తేదీ వంటి వివరాలపై స్పష్టత రావాల్సి ఉంది. ఈ అంశాలపై అధికారిక ప్రకటన వెలువడిన తర్వాతే అన్నామలై రాజకీయ ప్రణాళికపై పూర్తి వివరాలు తెలియనున్నాయి.
