ఆంధ్రప్రదేశ్‌లో(Andhra Pradesh) సోషల్‌ మీడియా పోస్టుల తొలగింపు వ్యవహారం ఇప్పుడు మరో వివాదానికి దారితీసింది. గుంటూరు (Guntur) పోలీసుల అధికారిక ఈ–మెయిల్‌ నుంచి ‘ఎక్స్‌’ ప్లాట్‌ఫామ్‌కు పంపిన టేక్‌డౌన్‌ రిక్వెస్ట్‌లో(Takedown Request) సంస్థ పేరు వద్ద ‘ఎఫ్‌బీఐ’(FBI) అని పేర్కొన్నట్లు వచ్చిన సమాచారం రాజకీయంగా తీవ్ర చర్చకు దారితీసింది. తొలుత అమెరికా ఫెడరల్‌ బ్యూరో ఆఫ్‌ ఇన్వెస్టిగేషన్‌ (ఎఫ్‌బీఐ) నుంచి ఫిర్యాదు వచ్చిందని భావించిన ‘ఎక్స్‌’. అనంతరం ఆ రిక్వెస్ట్‌ ఆంధ్రప్రదేశ్‌ పోలీసుల (Andhra Pradesh Police) నుంచే వచ్చిందని స్పష్టం చేసినట్లు పలు నివేదికలు పేర్కొన్నాయి.
ఈ వ్యవహారంపై వైఎస్సార్‌సీపీ(YSRCP) అధినేత, మాజీ ముఖ్యమంత్రి వైఎస్‌ జగన్‌మోహన్‌రెడ్డి (YS Jagan Mohan Reddy) స్పందిస్తూ చంద్రబాబు ప్రభుత్వంపై (Chandrababu Naidu Government) పలు ప్రశ్నలు సంధించారు. ‘రెడ్‌ బుక్‌ గవర్నెన్స్‌’ (Red Book Governance) ఇప్పుడు గ్లోబల్‌ స్థాయికి చేరిందంటూ వ్యంగ్యంగా వ్యాఖ్యానించిన జగన్‌.. అమెరికా ఎఫ్‌బీఐగా ఏపీ పోలీసులు తమను తాము చూపించుకుని ‘ఎక్స్‌’లో పోస్టుల తొలగింపునకు ప్రయత్నించారా అని ప్రశ్నించారు.
ప్రభుత్వం నెరవేర్చని సూపర్‌ సిక్స్‌ హామీలు(Super Six Promises), డీఎస్సీ నియామకాలపై (DSC Recruitments) వచ్చిన ఆరోపణలు, అమరావతిలో(Amaravati) అవినీతి వ్యవహారాలు(Corruption Issues), రాష్ట్ర అప్పులు(State Debts), పాలనా వైఫల్యాలు(Governance Failures),, ప్రశ్నించే వారిపై జరుగుతున్న వేధింపులపై విమర్శలను అణిచివేయడానికే ఇలాంటి చర్యలకు పాల్పడుతున్నారా అని జగన్‌ ప్రధానంగా ప్రశ్నించారు.
ఏపీ పోలీసులు ‘ఎఫ్‌బీఐ’ అనే పేరు ఎందుకు ఉపయోగించారు? ఆ టేక్‌డౌన్‌ రిక్వెస్ట్‌కు ఎవరి ఆదేశాలు ఉన్నాయి? ఉన్నతాధికారులకు ఈ విషయం తెలుసా? ఎన్ని సోషల్‌ మీడియా ఖాతాలపై ఇలాంటి ఫిర్యాదులు వెళ్లాయి? అనే అంశాల చుట్టూ ఇప్పుడు రాజకీయ చర్చ జరుగుతోంది. అయితే ఈ ప్రశ్నలకు ప్రభుత్వం లేదా పోలీసు శాఖ నుంచి స్పష్టమైన సమాధానం రావాల్సి ఉంది.
ఇప్పటికే సోషల్‌ మీడియా కంటెంట్‌ తొలగింపుపై (Social Media Content Removal) రాజకీయ, న్యాయపరమైన వివాదాలు కొనసాగుతున్నాయి. వైఎస్సార్‌సీపీకి చెందిన సోషల్‌ మీడియా ఖాతాల పోస్టుల టేక్‌డౌన్‌పై దాఖలైన పిటిషన్‌ను సుప్రీంకోర్టు(Supreme Court) ఆగస్టు 25న విచారణకు స్వీకరించకుండా, హైకోర్టును ఆశ్రయించాలని సూచించినట్లు లీగల్‌ రిపోర్టులు పేర్కొన్నాయి.
తాజాగా ఎఫ్‌బీఐ పేరును ముందుకు తెచ్చిన వ్యవహారంలో ప్రభుత్వంపై వస్తున్న విమర్శలకు సమాధానం చెబుతారా? లేక విమర్శించే గొంతులను అణిచివేయడానికి అధికార వ్యవస్థను మరోసారి ఉపయోగిస్తారా? అన్నదే ఇప్పుడు రాజకీయ చర్చగా మారింది. ప్రభుత్వ విధానాలను ప్రశ్నించడం ప్రజాస్వామ్యంలో సహజమైన ప్రక్రియ కాగా, ఈ టేక్‌డౌన్‌ రిక్వెస్ట్‌లో ‘ఎఫ్‌బీఐ’ పేరు ఎలా చేరిందన్నది మాత్రం అధికారిక వివరణ కోరుతున్న అంశంగా మారింది.
