రాష్ట్రంలో కూటమి ప్రభుత్వం (Coalition Government) అధికారంలోకి వచ్చినప్పటి నుంచి పోలీసు వ్యవస్థపై (Police System) ప్రభుత్వ పెద్దల (Government Leaders) ఒత్తిళ్లు ఉన్నాయనే ఆరోపణలు తరచూ వినిపిస్తున్నాయి. ప్రతిపక్ష నేతలు, ప్రభుత్వాన్ని ప్రశ్నించే వారిపై పోలీసులు వ్యవహరిస్తున్న తీరుపై కూడా విమర్శలు వ్యక్తమవుతున్నాయి. విజయవాడ కృష్ణలంక పోలీస్‌ స్టేషన్‌లో (Vijayawada Krishnalanka Police Station) గాదె సాయికృష్ణ (Gade Saikrishna) లాకప్‌డెత్‌ కేసు(Lock-up Death Case), అదే స్టేషన్‌ పరిధిలో పోలీసుల వేధింపుల ఆరోపణల నేపథ్యంలో క్రాంతికుమార్‌ (Kranthi Kumar) ఆత్మహత్య, తాజాగా డీఎస్సీ నియామకాలపై నిరసనలకు సంబంధించిన కేసులు ఈ చర్చకు మరింత ప్రాధాన్యం తీసుకొచ్చాయి.
డీఎస్సీ నియామకాల్లో (DSC Recruitments) అవకతవకలను ప్రశ్నిస్తూ విజయవాడలోని శాప్‌ కార్యాలయం వద్ద నిర్వహించిన నిరసనకు సంబంధించి వైఎస్సార్‌సీపీ(YSRCP) నాయకులు, కార్యకర్తలపై కేసులు నమోదు చేయడం, పలువురిని అరెస్టు చేయడం వివాదానికి దారితీసింది. మాచవరం పోలీసులు 30 మందిని కోర్టులో హాజరుపరచగా, 28 మందికి బెయిల్‌ మంజూరైందని, ఇద్దరికి రిమాండ్‌ విధించినట్లు సమాచారం. అంతకుముందు అరెస్టైన వైఎస్సార్‌సీపీ నేతలలో కొందరికి బెయిల్‌(Bail) మంజూరు చేస్తూ, పోలీసులు నమోదు చేసిన కొన్ని సెక్షన్లు వర్తించవని కోర్టు పేర్కొన్నట్లు పార్టీ వర్గాలు వెల్లడించాయి.
ఇదే సమయంలో 2021లో మంగళగిరి టీడీపీ(TDP) కార్యాలయంపై జరిగిన దాడి కేసును ఆధారంగా చేసుకుని ఎమ్మెల్సీ తలశిల రఘురాం(Talashila Raghuram), ఎన్టీఆర్‌ జిల్లా వైఎస్సార్‌సీపీ అధ్యక్షుడు దేవినేని అవినాష్‌ (Devineni Avinash) సహా 51 మంది వైఎస్సార్‌సీపీ నేతలపై రౌడీషీట్లు తెరవాలన్న ఆదేశాలు తీవ్ర రాజకీయ చర్చకు దారితీశాయి. అయితే అనంతరం ఈ చర్యలను తదుపరి ఆదేశాలు వచ్చే వరకు నిలిపివేయాలని విజయవాడ పోలీస్‌ కమిషనర్‌ పరిధిలోని అధికారులకు సెల్‌ మెసేజ్‌ ద్వారా సూచించినట్లు సమాచారం.
మాజీ ముఖ్యమంత్రి, వైఎస్సార్‌సీపీ అధ్యక్షుడు వైఎస్‌ జగన్‌మోహన్‌రెడ్డి (YS Jagan Mohan Reddy) గవర్నర్‌ (Governor) జస్టిస్‌ అబ్దుల్‌ నజీర్‌ను (Justice Abdul Nazeer) కలిసి పోలీసు వ్యవహారాలపై ఫిర్యాదు చేసిన నేపథ్యంలో రౌడీషీట్ల (Rowdy Sheets) అంశంలో పరిణామాలు మారడం కూడా చర్చనీయాంశమైంది. పోలీసు వ్యవస్థను శాంతిభద్రతల పరిరక్షణకు వినియోగించాల్సిన సమయంలో రాజకీయ విభేదాలు, నిరసనలను అణచివేసేందుకు ఉపయోగిస్తున్నారనే ఆరోపణలు వెల్లువెత్తుతున్నాయి. ఈ పరిణామాలు చివరకు న్యాయస్థానాల జోక్యానికి దారితీస్తున్నాయా? ప్రభుత్వ ఒత్తిళ్ల కారణంగా పోలీసు వ్యవస్థ వరుస వివాదాల్లో చిక్కుకుంటోందా? అనే ప్రశ్నలు ఇప్పుడు రాష్ట్రవ్యాప్తంగా చర్చకు వస్తున్నాయి.
