ఆస్కార్ అవార్డు గ్రహీత, ప్రముఖ గేయ రచయిత (Lyricist) చంద్రబోస్ (Chandrabose) కుటుంబంలో తీవ్ర విషాదం నెలకొంది. ఆయన సోదరుడు (Younger Brother) రాజేంద్ర (Rajendra) (60) ఆదివారం ఉదయం గుండెపోటుతో కన్నుమూశారు. ఈ ఆకస్మిక ఘటన కుటుంబ సభ్యులను మాత్రమే కాకుండా ఆయనకు సన్నిహితులైన వారందరినీ తీవ్ర దిగ్భ్రాంతికి గురిచేసింది.
అన్నమయ్య జిల్లా కలికిరి మండల కేంద్రానికి చెందిన తన స్నేహితుడిని కలిసేందుకు రాజేంద్ర శనివారం అక్కడికి వెళ్లారు. రాత్రి స్నేహితుడి (Friend) ఇంట్లోనే బస చేసిన ఆయన, ఆదివారం ఉదయం ఒక్కసారిగా అస్వస్థతకు గురయ్యారు. గుండెలో తీవ్ర నొప్పి ఉందని చెప్పడంతో అక్కడున్న వారు వెంటనే అప్రమత్తమై సమీపంలోని ప్రైవేటు ఆసుపత్రికి తరలించారు.
ఆసుపత్రిలో అత్యవసర చికిత్స అందిస్తున్న సమయంలోనే రాజేంద్ర ఆరోగ్యం మరింత విషమించింది. వైద్యులు ఎంత ప్రయత్నించినా ఫలితం లేకపోవడంతో ఆయన తుదిశ్వాస విడిచినట్లు సమాచారం. ఈ వార్త తెలియగానే చంద్రబోస్ కుటుంబ సభ్యులు శోకసంద్రంలో మునిగిపోయారు.
రాజేంద్ర మృతి పట్ల సినీ ప్రముఖులు, అభిమానులు సంతాపం వ్యక్తం చేస్తున్నారు. కుటుంబ సభ్యులు సంప్రదాయ పద్ధతిలో అంత్యక్రియలు నిర్వహించేందుకు ఏర్పాట్లు చేస్తున్నారు.ఈ ఘటనతో ఆ కుటుంబంలో విషాద వాతావరణం నెలకొంది.
