నగరంలో ఓట్ల తొలగింపు వ్యవహారం రాజకీయంగా వేడెక్కుతోంది. ఈ అంశంపై కాంగ్రెస్ నేత, మాజీ మంత్రి దానం నాగేందర్ ఎన్నికల కమిషన్ తీరుపై తీవ్ర అసంతృప్తి వ్యక్తం చేశారు. ఈసీ తన వైఖరిని మార్చుకోకపోతే ఈసీ కార్యాలయంతో పాటు హైదరాబాద్ నగరాన్ని తగలబెడతామని ఆయన హెచ్చరించారు. హిమాయత్ నగర్ డివిజన్‌లో సీసీ రోడ్ల పనుల ప్రారంభోత్సవ కార్యక్రమంలో పాల్గొన్న సందర్భంగా దానం ఈ వ్యాఖ్యలు చేశారు.
ఎన్నికల కమిషన్ అధికారులు బీజేపీతో కుమ్మక్కై పనిచేస్తున్నారని దానం నాగేందర్ ఆరోపించారు. హిమాయత్ నగర్ డివిజన్‌లోనే సుమారు 20 వేల ఓట్లను ఏకపక్షంగా తొలగించారని ఆయన పేర్కొన్నారు. ఢిల్లీ కేంద్రంగా బీజేపీ నాయకులు వ్యవస్థీకృతంగా ‘ఓట్ చోరీ’కి పాల్పడుతున్నారని విమర్శించారు.
ఎన్నో ఏళ్లుగా స్థానికంగా నివసిస్తున్న ప్రజల ఓట్లను తొలగించడం ప్రజాస్వామ్యాన్ని అవమానించడమేనని దానం నాగేందర్ అన్నారు. తన నియోజకవర్గ పరిధిలో ప్రతి ఒక్కరి ఓటును కాపాడేందుకు కృషి చేస్తానని స్పష్టం చేశారు.
తొలగించిన ఓట్లను ఎన్నికల కమిషన్ వెంటనే పునరుద్ధరించాలని దానం నాగేందర్ డిమాండ్ చేశారు. ఈ విషయంలో ఈసీ స్పందించకపోతే నిరసనలు, ఆందోళనలను మరింత ఉధృతం చేస్తామని హెచ్చరించారు. ప్రభుత్వం, ఎన్నికల కమిషన్‌కు వ్యతిరేకంగా తీవ్ర స్థాయిలో పోరాటాలు చేపడతామని తెలిపారు.
ఈ కార్యక్రమంలో స్థానిక పార్టీ నాయకులు, కార్యకర్తలు పెద్ద సంఖ్యలో పాల్గొన్నారు.
