టీజీ-ట్రాన్స్‌కో ప్రైవేటీకరణపై హరీశ్‌రావు అభ్యంతరం.. రాహుల్‌కు కీలక లేఖ!

తెలంగాణ విద్యుత్‌ రంగంలో టీజీ-ట్రాన్స్‌కోలో(TG-TRANSCO) 26 శాతం వాటా తగ్గింపు, ఐపీవో ప్రతిపాదనపై(IPO Proposal) మాజీ మంత్రి, బీఆర్‌ఎస్‌ నేత హరీశ్‌రావు (Harish Rao) అభ్యంతరం వ్యక్తం చేశారు. ఈ అంశంపై కాంగ్రెస్‌ అగ్రనేత రాహుల్‌గాంధీ (Rahul Gandhi) జోక్యం చేసుకోవాలని కోరుతూ లేఖ రాశారు. ట్రాన్స్‌కోతో(TRANSCO) పాటు టీజీ-జెన్‌కో(TG-GENCO), సింగరేణి(Singareni), డిస్కంలు (DISCOMs) వంటి కీలక ప్రభుత్వ రంగ సంస్థలను ప్రైవేటీకరణ నుంచి కాపాడాలని కోరారు.

ట్రాన్స్‌కోపై హరీశ్‌రావు ప్రశ్నలు

టీజీ-ట్రాన్స్‌కో తెలంగాణ విద్యుత్‌ వ్యవస్థలో(Power System) కీలకమైన ప్రజా సంస్థ అని హరీశ్‌రావు పేర్కొన్నారు. సంస్థ పరిధిలో 29, 400 కేవీ, 107, 220 కేవీ, 337, 132 కేవీ సబ్‌స్టేషన్లు, 31,420కుపైగా సర్క్యూట్‌ కిలోమీటర్ల ఈహెచ్‌టీ లైన్లు, 1,184 పవర్‌ ట్రాన్స్‌ఫార్మర్లు ఉన్నాయని తెలిపారు.

26 శాతం వాటా తగ్గింపు (26% Stake Reduction) తొలి అడుగేనా? భవిష్యత్తులో మిగిలిన వాటాను కూడా ప్రైవేట్‌ సంస్థలకు అప్పగిస్తారా? అని హరీశ్‌రావు ప్రశ్నించారు. జెన్‌కో, సింగరేణి, డిస్కంల భవిష్యత్‌ యాజమాన్యంపై ప్రభుత్వం స్పష్టత ఇవ్వాలని డిమాండ్‌ చేశారు.

అయితే టీజీ-ట్రాన్స్‌కో మాత్రం ప్రైవేటీకరణ(Privatization), వాటా విక్రయం లేదా పబ్లిక్‌ ఇష్యూపై ఎలాంటి తుది నిర్ణయం తీసుకోలేదని స్పష్టం చేసింది. సంస్థ ఆర్థిక పరిస్థితి, రుణభారం తదితర అంశాలను పరిశీలించి ఆర్థిక స్థితిని బలోపేతం చేసే మార్గాలను అధ్యయనం చేస్తున్నట్లు తెలిపింది.

కాంగ్రెస్‌ విధానంపై హరీశ్‌రావు ప్రశ్నలు

2023 రాయ్‌పూర్‌ ప్లీనరీలో(2023 Raipur Plenary) కాంగ్రెస్‌ ఆమోదించిన ఆర్థిక తీర్మానాన్ని ప్రస్తావించిన హరీశ్‌రావు.. వ్యూహాత్మక ప్రభుత్వ రంగ సంస్థల్లో డిజ్‌ఇన్వెస్ట్‌మెంట్‌ విధానంపై కాంగ్రెస్‌ జాతీయ నాయకత్వం స్పష్టత ఇవ్వాలని కోరారు. ప్రతిపక్షంలో ఉన్నప్పుడు వాటా విక్రయాలను ప్రశ్నించిన కాంగ్రెస్‌.. తెలంగాణలో అధికారంలో ఉన్నప్పుడు అదే దిశగా చర్యలు ఎందుకు చేపడుతోందని ప్రశ్నించారు.

ట్రాన్స్‌కోలో 26 శాతం వాటా తగ్గింపు, జెన్‌కో, సింగరేణి, డిస్కంల విషయంలో ప్రభుత్వ ప్రణాళిక ఏమిటో వెల్లడించాలని డిమాండ్‌ చేశారు.

కల్యాణలక్ష్మిపై హరీశ్‌రావు వ్యాఖ్యలు

కల్యాణలక్ష్మి పథకానికి (Kalyana Lakshmi Scheme) 12 ఏళ్లు పూర్తైన సందర్భంగా హరీశ్‌రావు స్పందించారు. పేద కుటుంబాల ఆడబిడ్డలకు ఆర్థిక భరోసా (Financial Support) కల్పించడంతో పాటు బాల్య వివాహాలను (Child Marriages) అడ్డుకోవడంలో ఈ పథకం కీలక పాత్ర పోషించిందని పేర్కొన్నారు.

2014 అక్టోబర్‌ 2న రూ.51,000 సాయంతో ప్రారంభమైన పథకం మొత్తాన్ని 2017లో రూ.75,116కు, 2018లో రూ.1,00,116కు పెంచినట్లు తెలిపారు. బీఆర్‌ఎస్‌(BRS) పాలనలో 13,15,297 మంది లబ్ధిదారులకు రూ.11,560 కోట్లకుపైగా సాయం అందించినట్లు పేర్కొన్నారు.

కల్యాణలక్ష్మి పెండింగ్‌ దరఖాస్తులను పరిష్కరించడంతో పాటు ఎన్నికల సమయంలో కాంగ్రెస్‌ ఇచ్చిన తులం బంగారం హామీని నెరవేర్చాలని హరీశ్‌రావు డిమాండ్‌ చేశారు.